«ԵՏՄ անդամակցության ընթացքում Հայաստանի անվտանգության ռիսկերը ոչ թե նվազեցին, այլ մեծացան, եւ Հայաստանի՝ մարտահրավերների հաղթահարման գործում հնարավորությունները էապես նվազեցին»,- մայիսի 13-ին Միջազգային եւ անվտանգության հարցերի հայկական ինստիտուտի կազմակերպած փորձագիտական կլոր սեղանի ընթացքում հայտարարեց քաղաքական վերլուծաբան Ռուբեն Մեհրաբյանը: Կլոր սեղանի թեման էր «Հայաստան. 4 միս ԵՏՄ-ում անկման մեջ եւ փլուզմանն ընդառա՞ջ»:
Ռուբեն Մեհրաբյանը նկատեց, որ ԵՏՄ անդամակցության ընթացքում Հայաստանը նաեւ տնտեսական զարգացում չի գրանցել. «Եթե խոսքը 170 միլիոնանոց շուկայի մասին է, ապա դա շատ մեխանիկական մոտեցում է, որովհետեւ այդ շուկան գտնվում է անդառնալի կազմալուծման գործընթացում. կան բազմաթիվ ներքին խոչընդոտներ եւ շուկան ազատ չէ: Այնտեղ նաեւ գործում են վարչահրամայական եղանակները, եւ մենք շատ լավ գիտենք, որ ձեւավորված է մեկ մարդու որոշումների համակարգ»:
Քաղաքական վերլուծաբանը համարում է, որ Հայաստանի՝ Եվրասիական տնտեսական միությանն անդամակցությունը սերտորեն կապված է Ուկրաինայում տեղի ունեցածի հետ. «Դատելով Ռուսաստանի բարձրաստիճան պաշտոնյաների հայտարարություններից, կարելի է ասել, որ Հայաստանում Ռուսաստանը ոչ մի խոչընդոտ չունի թե՛ ընդդիմությունում, թե՛ իշխանությունում, միակ դիմադրությունը նրանք հասարակայնության մեջ են տեսնում: Կարելի է ասել՝ Ռուսաստանն այսօր քաղաքականապես ակտիվ երիտասարդությանը պատերազմ է հայտարարել: Այս ամենը կոչվում է նարնջագույն վտանգ, իսկ Ռուսաստանի ուժայինները այդ նարնջագույն վտանգը հայտարարել են որպես Ռուսաստանի ազգային անվտանգության թիվ մեկ սպառնալիք: Հավանականությունը շատ մեծ է, որ Ռուսաստանը մեծացնելով իր հնարավորությունները, Հայաստանին ստիպի ընդունել Յանուկովիչի ռեպրեսիվ փաթեթը, որը Ուկրաինայում պայթեցրեց իրավիճակը»:
Ամի ՉԻՉԱԿՅԱՆ
