Այսօր առավոտվանից «Նաիրիտ» գործարանի նախկին աշխատակիցները պաստառներով պատրաստված եկել են՝ կառավարության առաջ երկօրյա նստացույցի:
Առայժմ կառավարությունից նաիրիտցիների մտադրությանը որեւէ մեկը չի արձագանքել: Նրանց բողոքի ակցիան հսկում են ոստիկանները, որոնք չեն թույլատրում ակցիայի որեւէ մասնակցի մոտենալ կառավարության շենքին:
Անդրադառնալով Էներգետիկայի եւ բնական պաշարների նախարար Երվանդ Զախարյանի երեկվա հայտարարությանը, թե Համաշխարհային բանկի տրամադրած դրամաշնորհային միջոցներով «Նաիրիտում» կատարված ուսումնասիրությունները, որոնց նպատակն էր պարզելու՝ նպատակահարմա՞ր է գործարանը վերագործարկել, թե՝ ոչ, նախարարն ասել էր, որ մասնագետները բացասական եզրակացության են եկել, նաիրիտցիների բողոքի ակցիան համակարգող Անուշ Հարությունյանն ասաց, որ գործարանը «շատ էլ լավ կարող է աշխատել»: Նրա խոսքերով, մութ ու ցուրտ տարիներին կարողացել են այն աշխատեցնել, սակայն, երբ հիմա իշխանությունները պարբերաբար խոսում են «փայլուն ապագայի մասին» հնարավոր չէ՞:
«Ես ութ տարի աշխատում եմ «Նաիրիտ» գործարանում» եւ կարող եմ ասել, որ եթե ուզեն, գործարանը կաշխատեցնեն»:
Կարդացեք նաև
Նաիրիտցիները որոշել են նստացույցը սկսել ժամը 13-ին, մինչ այդ կսպասեն կառավարության արձագանքին: Նրանց պահանջն է, որպեսզի, ոչ թե ամեն ամիս բողոքի ակցիաներ անելով մեկ ամսվա աշխատավարձը պոկեն, այլ կառավարությունը հստակ ժամանակացույց սահմանի եւ ամեն ամիս պարտք աշխատավարձերը վճարի:
Լուսինե ԲՈՒԴԱՂՅԱՆ
