Հունիսի 11-ի երեկոյան տեղացած կարկուտը վնասներ է պատճառել Նոյեմբերյանի տարածաշրջանի Արճիս, Լճկաձոր, Այրում, Զորական,Պտղավան, Կողբ, Բերդավան, Նոյեմբերյան բնակավայրերին: Կարկտահարության վնասները առավել մեծ են Լճկաձորում եւ Արճիսում:
Արճիսի գյուղապետ Սեյրան Միկիչյանը հայտնեց, որ կարկտահարությունը տեւել է շուրջ կես ժամ՝ 21.58-ից մինչեւ 22. 27-ը: Ս. Միկիչյանը հայտնեց, որ խոշոր կարկուտից գյուղի տների տանիքների ազբոշիֆերների կեսը ջարդվել է, պատուհանների շատ ապակիներ են փշրվել, խաղողի, պտղատու այգիների բերքն ամբողջությամբ ոչնչացել է: Գյուղապետի վկայությամբ՝ Արճիսում կանաչ տերեւ չի մնացել:
Նրան հարցրինք՝ ճի՞շտ է, որ հուսահատված արճիսցիները ցանկացել են այսօր փակել գյուղից ներքեւ ձգվող միջպետական ճանապարհը: Գյուղապետն ասաց, որ ինքը ներկայացրել է իրավիճակը Տավուշի մարզպետ Հովիկ Աբովյանին, մարզպետն արճիսցիներին հորդորել է ետ մնալ նման քայլից, ասելով, որ կառավարությունը ըստ հնարավորի կսատարի արճիսցիներին:
Ս. Միկիչյանն ասաց, որ վնասները ուսումնասիրելու համար շուտով Արճիս կժամանեն Տավուշի մարզպետի տեղակալ Լեւոն Սարգսյանը, մարզի փրկարար վարչության պետ Վաղինակ Հովսեփյանը:
Կարդացեք նաև
Լճկաձոր գյուղից տեղեկացանք, որ կարկուտն ամբողջությամբ ոչնչացրել է պտղատու եւ խաղողի այգիների բերքը, ցանքատարածությունները, վնասել մի քանի տան տանիք: Հավելենք, որ այս տարածքներում հակակարկտային կայաններ չկան:
Ոսկան ՍԱՐԳՍՅԱՆ
