Հունիսի 25-ին Բագրատաշենի մաքսակետով Հայաստանից ծիրան արտահանող մեկուկես տասնյակ ավտոմեքենաների վարորդներին Սադախլոյի մաքսակետում տուգանել եւ Հայաստան են վերադարձրել: Վրացի մաքսավորները պատճառաբանել են, որ մեքենաներին բեռնված ծիրանի քաշը մի քիչ, օրինակ՝ 20-50 կգ, ավելի է եղել մեքենայի թույլատրելի բեռնատարողությունից: Այդ պատճառաբանությամբ հայկական մեքենաների վարորդներից յուրաքանչյուրին տուգանել են 2000-ական դոլարի չափով, ետ վերադարձրել Բագրատաշենի մաքսակետ: Ծիրան տեղափոխողները այնտեղ բեռի քաշը համապատասխանեցրել են թույլատրելի բեռնատարողությանը, ծիրանի արտահանման նոր փաստաթղթեր պատրաստել:
Ծիրան արտահանողներից մեկը, չցանկանալով իր անունը հրապարակել, դժգոհեց գյուղատնտեսության նախարար Սերգո Կարապետյանից, որը հեռուստաալիքներով զեկուցում է Հայաստանից ծիրանի արտահանման արդյունավետ գործընթացի մասին, սակայն չի այցելում Բագրատաշենի մաքսակետ՝ տեսնելու այդ գործում առկա խոչընդոտները:
Բագրատաշենի մաքսակետի աշխատակիցներից տեղեկացանք, որ Սադախլոյի մաքսակետի աշխատողները միայն ծիրանի արտահանման գործում չեն խոչընդոտներ ստեղծում: Նրանք հարկի-անհարկի տուգանում են Հայաստանի քաղաքացիներին. Սադախլոյի մաքսակետի տարածքում առանց ամրացված անվտանգության գոտու երթեւեկելու կամ մեքենայի ղեկին բջջային հեռախոսով խոսելու համար եւ այլ առիթներով:
Ոսկան ՍԱՐԳՍՅԱՆ
