Վաղ առավոտից Բաղրամյան պողոտայում նստացույց անող քաղաքացիները զանգահարում են «Սանիտեկ» ընկերություն՝ պողոտայում աղբահանում չիրականացնելու խնդրով: Բայց ընկերությունից չեն արձագանքել զանգերին:
Քիչ առաջ մի խումբ ցուցարարներ դիմեցին Երեւանի փոխոստիկանապետ Վալերի Օսիպյանի օգնությանը:
«Իմ նախաձեռնությամբ մինչեւ ձեր մոտենալը, զանգահարել եմ, անհասանելի են»,- ասաց պարոն Օսիպյանը:
Ցուցարարներից մեկն էլ ասաց. «Որ այդպես է՝ հիմա մեկ զիբիլ հանեմ, դնեմ փողոցի մեջտեղում՝ երթեւեկելի հատվածում, որ գան տանեն»:
Կարդացեք նաև
«Ուրեմն կհայտնվեք ոստիկանությունում»,- արձագանքեց փոխոստիկանապետը:
Պարոն Օսիպյանն ասաց, որ աղբահանման հարցը ոստիկանության լիազորություններում չէ, ապա ցուցարարներին ասաց՝ իրենց ակցիան ապօրինի է. «Մարդիկ բողոքում են, մարդկանց աղբահանման հարցը խախտել եք, յուրաքանչյուր աղբաման, մեծ թվով քաղաքացիների կարիքներ է հոգում, տարեք տեղադրեք իրենց տեղում… Ուզում եք ամեն ինչ ձեր սրտով լինի, ձեր կամքն եք թելադրում, ինչպես ձեզ է հարմարավետ, այնպես եք անում, բայց դուք չեք առաջնորդվում համակեցության կանոններով ու օրենքով: Ինչի՞ դրա մասին չեք խոսում, այդ մասին ինչո՞ւ չեք բարձրաձայնում: Փորձում ենք տեւական ժամանակ ձեզ հետ լինել կառուցողական, համագործակցել, բայց կենտրոնական պողոտաներից մեկն եք պարալիզացրել, արդեն քանի օր է, ինչո՞ւ այդ մասին չեք անհանգստանում»:
Արփինե ՍԻՄՈՆՅԱՆ
