Այս ժամին Բաղրամյան պողոտան համեմատաբար սակավամարդ է:
«Ոչ թալանին» նախաձեռնության ակցիայի մասնակիցները, որոնք հիմնականում երիտասարդներն են, ֆուտբոլ, վոլեյբոլ ու այլ խաղեր են խաղում: Ակցիայի մասնակիցների մեջ կան նաեւ այնպիսիք, որոնք օրվա մեծ մասն են այստեղ անցկացնում՝ անտեսելով կիզիչ արեւը, անձրեւը կամ քամին: Հասկանալի է, որ մարդկային կուտակումների պարագայում ոմանց մոտ ինքնազգացողության հետ կապված խնդիրներ կարող են ծագել:
Հենց այդ նպատակով բժշկական համալսարանի՝ ակցիայի մասնակից ուսանողները, ինչպես նաեւ բժշկական կրթություն ունեցող անձինք տեղում առաջին օգնություն հանպատրաստից բուժկետ են ստեղծել: «Տեսնելով, որ բողոքի ցույցի մասնակիցների մեջ հաճախակի են առողջության հետ կապված խնդիրներ առաջանում եւ մեկը մյուսին իր իմացած դեղերն է տալիս, որը կարող է վտանգավոր լինել, մենք մեր նախաձեռնությամբ որոշեցինք այդ գործի կազմակերպումը վերցնել մեզ վրա: Մեր «բժշկական սենյակում» օգտագործում ենք միայն օրինական, լիցենզավորված այնպիսի դեղեր, որոնք յուրաքանչյուր քաղաքացի կարող է ազատորեն գնել ցանկացած դեղատնից: Մենք մարդկանց առաջին բուժօգնություն ենք ցույց տալիս, մինչեւ շտապ օգնության մեքենան տեղ կհասնի, եթե, իհարկե, դրա կարիքը լինում է», – ասում են ուսանող բժիշկները:
Կարդացեք նաև
Հարցին, թե նրանց օգնությանը դիմողներ շա՞տ են լինում, նրանք պատասխանեցին. «Կոնկրետ չենք հաշվում, բայց քիչ չեն»:
Աշոտ ՀԱԿՈԲՅԱՆ
