Կառավարության նիստից հետո Ֆիրդուսիի բնակիչները, որոնք կառավարության շենքի առաջ սպասում էին, որպեսզի նիստը ավարտվի եւ իրենք հանդիպեն վարչապետ Հովիկ Աբրահամյանին, պատասխան չստանալով շտապեցին փակել Տիգրան Մեծ փողոցը: Մի քանի րոպե փողոցը փակ մնալուց հետո այն բացեցին ոստիկանները՝ Երեւանի փոխոստիկանապետ Վալերի Օսիպյանի գլխավորությամբ, որը «ֆիրդուսցիներին» հանգստացրեց, թե ինքը կփորձի վարչապետի հետ հանդիպում կազմակերպել:
«Վար-չա-պետ, սը-տա-խոս»՝ բղավում են կառավարության առջեւ նստացույց սկսած Ֆիրդուսի փողոցի բնակիչները: Նրանց խոսքերով՝ «թող իրենց վիլլաները վաճառեն, մեր տները տան: Նույն ինքը՝ վարչապետը այդքան ունեցվածք ունի, եթե մի հողամաս վաճառի՝ բոլորիս տան հարցը կլուծվի»:
Քիչ առաջ ցուցարարների հետ հանդիպման իջավ Հովիկ Աբրահամյանի խորհրդականը՝ Հայկ Դավթյանը, որն ասաց, որ ֆիրդուսցիների հարցը ընթացքի մեջ եւ իրենք բնակիչների հետ ունեն պայմանավորվածություն:
Այս պահին բնակիչներին լսելու է իջել նաեւ կառավարության նամակների բաժնի ղեկավար Ալեքսանդր Ղազարյանը: Ցուցարարները դիմելով նրան ասացին՝ «դուք ինչո՞ւ եք իջել, թող վարչապետը գա, ի՞նչ է, վախենո՞ւմ է: Անընդհատ խաբում եք ու խաբում, 8 տարի է անցել»:
Կարդացեք նաև
Պարոն Ղազարյանն առաջարկում է 5 հոգի բարձրանան վարչապետի հետ հանդիպման, սակայն ֆիրդուսցիները չեն համաձայնվում, պնդելով, որ բոլորը պետք է հանդիպեն՝ «եղած-չեղած մի 15-20 բնակիչ ենք: Չենք հեռանալու, մեր մահճակալները բերելու ենք այստեղ քնենք: Միեւնույն է՝ տուն չունենք»:
Կառավարության ներկայացուցիչները դեռ ցուցարարներին համոզում են փոքր պատվիրակությամբ վերեւ բարձրանալ, պատճառաբանելով, որ 20 հոգի մարդ սենյակում չեն տեղավորվի:
Լուսինե ԲՈՒԴԱՂՅԱՆ
