Ինչպես արդեն տեղեկացրել ենք՝ Վերաքննիչ քրեական դատարանը Արա Բուդաղյանի խափանման միջոց նշանակված կալանքը թողեց անփոփոխ: Փաստաբան Հայկ Ալումյանը Aravot.am-ի եւ «168 ժամի» հետ զրույցում ասաց, որ դատական ակտը բողոքարկելու է Վճռաբեկ, ապա Մարդու իրավունքների եվրոպական դատարան:
Հայկ Ալումյանի խոսքերով՝ անձին կարելի է կալանավորել, եթե վտանգ, որ նա քննության ընթացքում կարող է թաքնվել քննությունից, խոչընդոտել քննությանը կամ նոր հանցանք կատարել. «Որեւէ նման հիմք այստեղ չի ներկայացվել, ոչ մի նման հիմք չի ներկայացվել: Քննիչը եւ դատախազը պարզապես վկայակոչում են այն փաստը, որ մեղադրվում է ծանր հանցագործության կատարման մեջ: Բայց մեղադրվել դեռ չի նշանակում մեղավոր լինել, եւ ցանկացած մարդ, ով մեղադրվում է, չի նշանակում, որ պիտի կալանավորվի: Մեզ մոտ, ցավոք, ամեն ինչ գլխիվայր է շուռ տված»:
Փաստաբանը հավելեց, որ դատական նիստի ընթացքում վկայակոչել է Ժիրայր Սեֆիլյանի գործով ՀՀ դեմ կայացված վճիռը, որը Մարդու իրավունքների եվրոպական դատարանը համարել է խախտում. «Ցավոք, մեր դատարաններն անգամ իրենց սխալների վրա չեն սովորում: Դա վատագույն տարբերակն է: Խելացիները սովորում են ուրիշների սխալների վրա, ոչ այդքան խելացիները սեփական սխալի վրա են սովորում, մեր դատարաններն անգամ սեփական սխալի վրա չեն սովորում, իսկ դա արդեն շատ վատ բան է: Մեր դատական համակարգը կալանավորման հետ կապված գործերով այդպես էլ ոչ մի քայլ առաջ չի գնացել, մնացել է նույն տեղում, որից սկսվել էին այդ կոչեցյալ բարեփոխումները»:
Aravot.am-ի հարցին, թե որոշումը կայացնելու վրա հնարավո՞ր է, որ Սուրիկ Խաչատրյանի գործոնը ազդեր, նա պատասխանեց, թե չգիտի. «Ես մտածում եմ, որ մեր դատարանները սովորաբար, եթե Ազգային անվտանգության ծառայությունը անձին կալանավորելու միջնորդություն է ներկայացնում, կարծես թե մթագնում են: Իրենք ե՛ւ մոռանում են եվրոպական կոնվենցիաները, ե՛ւ ներպետական օրենքները, ե՛ւ այն բոլոր այն սեմինար-պարապմունքները, որ նրանց հետ անցկացվել են, ե՛ւ մարդկային գործոնն է դադարում աշխատել: Ես դեռ չեմ տեսել, որ անձին կալանավորելու Ազգային անվտանգության ծառայության միջնորդությունները մերժվեն: Երբեմն ստեղծվում է տպավորություն, որ մեր դատարանները կարծես թե ԱԱԾ ստորաբաժանումներ լինեն, ուղղակի դատարանի շենքում են գործում, դատարանի քողի տակ»:
Կարդացեք նաև
Ամի ՉԻՉԱԿՅԱՆ
