Համայնքապետերը պետք է բարելավեն հարկերի հավաքագրման ցուցանիշները
Սեպտեմբերի 23-ին կայացած Տավուշի մարզխորհրդի նիստում մարզպետարանի ֆինանսատնտեսագիտական բաժնի վարիչ Ասքանազ Բաբլումյանը ներկայացրեց համայնքների 2015թ. տեղական բյուջեների սեփական եկամուտների 8 ամսվա կատարողականի հաշվետվությունը: 2015թ. սեպտեմբերի 1-ի դրությամբ մարզի համայնքների եկամուտների փաստացի մուտքը կազմել է 2089,9 միլիոն դրամ,որը 8 ամսվա կտրվածքով նախատեսվածի 97,8 տոկոսն է: Սեփական եկամուտների հավաքագրումը կազմել է 392,5 միլիոն դրամ կամ կատարվել է 8 ամսվա նախատեսված եկամուտների 86,7 տոկոսը: Ա. Բաբլումյանը ներկայացրեց առանձին հարկատեսակների գծով ամենացածր կատարողական ունեցող համայնքները: Հողի հարկի մասով ամենացածր կատարողականներ ունեն Հաղթանակը՝ 21,3 տոկոս, Պտղավանը՝ 21,7 տոկոս, Խաշթառակը՝ 22,7 տոկոս եւ այլն:
Տավուշի մարզպետ Հովիկ Աբովյանը Հաղթանակի եւ Պտղավանի գյուղապետեր Վահրամ Շարոյանին եւ Արայիկ Պարանյանին հարցրեց,թե ինչո՞ւ նրանց ղեկավարած համայնքապետարանները հողի հարկի հավաքագրման ցածր կատարողական ունեն: Այդ գյուղապետերը հավաստիացրին, որ հողի հարկի հավաքագման առաջադրանքը կկատարեն: Մարզպետը նրանց եւ հողի հարկի հավաքագրման ցածր կատարողական ունեցող մյուս համայնքների ղեկավարներին 10 օր ժամանակ տվեց հողի հարկի կատարողականը նախատեսվածի 60 տոկոս հասցնելու համար: Մարզպետը հայտարարեց, որ հողի հարկի հավաքագրման 60 տոկոս ցուցանիշ ունեցող համայնքապետերն էլ պետք է նշված ցուցանիշը այդ ժամկետում հասցնեն 80 տոկոսի:
Ոսկան ՍԱՐԳՍՅԱՆ
