Արմավիրում աղբի վերամշակման գործարան կհիմնվի

33 միլիոն եվրո վարկային ծրագրով աղբի վերամշակման գործարան եւ ջերմոցային տնտեսություն է կառուցվելու

Արմավիրի մարզում նախատեսվում է աղբի վերամշակման գործարան կառուցել եւ  ջերմատնային տնտեսություն հիմնել:

Այս ներդրումային ծրագրի արժեքը, ինչպես տեղեկանում ենք կառավարության նիստի օրակարգից, 33 միլիոն եվրո է: Սա վարկային ծրագիր է, վարկի մարումը իրականացվելու 7 տարվա ընթացքում՝ կանխատեսվող շահույթի հաշվին:

Գործարանն ու ջերմատնային տնտեսությունը հիմնվելու է       Արմավիր քաղաքի հյուսիսային մասի, աղբավայրի հարակից 15.0 հա հողատարածության վրա:

Ըստ ծրագրի, 33 միլիոն եվրոյից 21 միլիոնն ուղղվելու է աղբի վերամշակման գործարանի կառուցմանը, իսկ 11 միլիոնը՝ ջերմոցային տնտեսության հիմնմանը, 1 միլիոնն էլ՝ այլ ծախսերին:

Այս ծրագրի մարքեթինգային պլանով նախատեսվում է աղբի վերամշակման արդյունքում էլեկտրաէներգիայի արտադրություն, որը ծախսվելու է ջերմոցային տնտեսության կարիքների համար, իսկ  ավելացած մասը վաճառվելու է պետությանը, ջերմոցային տնտեսության արտադրանքի  իրացումն էլ՝ արտերկրում: Ընդ որում, ծրագրով արդեն սահմանվել է, որ առաջին տարում պոտենցյալ հաճախորդները լինելու են արտերկրի ձեռնարկատերերը:

Ծրագրի՝ Պահանջարկի ընդհանուր մեծություն բաժնում գրված է՝ Էլեկտրաէներգիայի չսահմանափակված վաճառք պետությանը, գյուղմթերքների մեծ պահանջարկ՝ արտերկրում:

Ուշագրավ է ծրագրի մարքեթինգային ռազմավարությունը, որտեղ գրված է՝

Լինելու են հեռախոսազանգեր եւ անհատական հանդիպումներ

Ապահովվելու է որակյալ արտադրանք

Ապրանքային տեսքը լինելու է համաչափ

Լինելու է համապատասխան տեսակավորում

Մշտական կապ է ապահովվելու հաճախորդների հետ

Մշտապես իրականացվելու է համագործակցություն գործընկերների հետ եւ ապահովվելու է որակյալ սպասարկում: Ծրագրով նախատեսվում է 100-120 աշխատատեղ բացել: Այս ծրագիրն իրականացնելու է հայ-չեխական «Գրինէկո-Կաս»  ՍՊԸ-ն, որին էլ կառավարության որոշմամբ կօտարվի Արմավիր քաղաքի վարչական տարածքից 15.0 հա հողատարածքը: «Գրինէկո-Կասը»  պարտավորվում է՝ պայմանագրի պայմաններին համապատասխան վճարել պայմանագրի գինը՝ իրականացնել  շուրջ 17 մլրդ 490 մլն դրամի ներդրում` գործարանի կառուցման եւ ջերմոցային տնտեսություն հիմնելու համար: Ընդ որում, գործարանն ու ջերմոցային տնտեսությունը պետք է 3 տարվա ընթացքում կառուցի:

Նելլի ԲԱԲԱՅԱՆ