Ծանրամարտի Հայաստանի տղամարդկանց (Ծաղկաձորում) եւ կանանց (Աբովյանում) ազգային հավաքականները երեկ ավարտել են հայաստանյան նախապատրաստությունը նոյեմբերի 20-ին Հյուսթոնում մեկնարկող աշխարհի առաջնությանը եւ հոկտեմբերի 28 լույս 29-ի-ի գիշերը մեկնում են Կազան՝ վերջին ուսումնամարզական հավաքն անցկացնելու:
Աշխարհի առաջնությունում, որը 2016 թվականի օլիմպիական խաղերի վարկանիշային մրցաշար է, ընդհանուր առմամբ մրցահարթակ կմտնեն 11 ծանրորդներ: Նրանք են:
Տղաներ. 69 կգ՝ Վանիկ Ավետիսյան, 77 կգ՝ Տիգրան Վ. Մարտիրոսյան եւ Անդրանիկ Կարապետյան, 105 կգ՝ Սիմոն Մարտիրոսյան, +105 կգ՝ Ռուբեն Ալեքսանյան եւ Գոռ Մինասյան:
Աղջիկներ. 53 կգ՝ Աննա Գովելյան, 58 կգ՝ Իզաբելլա Յայլյան, 69 կգ՝ Նազիկ Ավդալյան, 75 կգ՝ Սոնա Պողոսյան, +75 կգ՝ Հռիփսիմե Խուրշուդյան:
Կարդացեք նաև
Հիշեցնենք, որ մեր տղաների ընտրանին պայքարելու է հինգ, իսկ աղջիկներինը՝ 2-3 ուղեգրի համար:
Կանանց հավաքականի կազմից դուրս է մնացել Մելինե Դալուզյանը, որին փոխարինել է Սոնա Պողոսյանը: Պատճառն այն է, որ Մելինեն, որը մասնակցել է հավաքներին, երկու վիրահատությունից հետո չի հասցրել մինչեւ վերջ վերականգնել աջ արմնկահոդի մկանի գործունեությունը եւ մրցման ժամանակ թեւը մինչեւ վերջ չբացելու դեպքում մրցավարները կարող են դիտարկել որպես վարժության ոչ մաքուր կատարում, հետեւաբար, գնահատել զրո:
Աշոտ ՀԱԿՈԲՅԱՆ
