Այսօր ԱԺ-ն առաջին ընթերցմամբ ընդունեց «Պետական նպաստների մասին» օրենքում փոփոխություն կատարելու վերաբերյալ կառավարության նախագիծը՝ 97 կողմ, 12 ձեռնպահ ձայների հարաբերակցությամբ:
ՀՀԿ պատգամավորների ներկայացրած «Նույնականացման քարտերի մասին» օրենքում փոփոխություն կատարելու նախագիծը, որը օրեր շարունակ բուռն քննարկվում էր խորհրդարանում, ամբողջությամբ ընդունվեց 74 կողմ, 13 դեմ եւ 18 ձեռնպահ ձայների հարաբերակցությամբ:
Քվեարկության դրվեց նաեւ Կենտրոնական բանկի մասին օրենքում փոփոխություն կատարելու մասին կառավարության նախագիծը, որով առաջարկվում է ԿԲ տեղակալների թիվն ավելացնել մեկով:
Կարդացեք նաև
Հիշեցնենք, որ երեկ ԲՀԿ խմբակցության պատգամավոր Տիգրան Ուրիխանյանը հետաքրքրվել էր, թե ինչքա՞ն աշխատավարձ է ստանալու այդ տեղակալը, բայց ԿԲ նախագահ Արթուր Ջավադյանը չէր պատասխանել: Ավելի ուշ հայտնի դարձավ, որ խոսքը 1 մլն 300 հազար դրամ աշխատավարձի մասին է:
Այսօր մինչ քվեարկությունը Տիգրան Ուրիխանյանն այս առնչությամբ ասաց. «Նման հաստիք այսօր առաջացնելը չափազանց բացասական երեւույթ է՝ երկրում ճգնաժամի առկայության պայմաններում»:
Հետո Տիգրան Ուրիխանյանը հայտարարեց, որ ԿԲ փոխնախագահ Ներսես Երիցյանը, լրագրողներին հայտարարելով, որ ր աշխատավարձը 1 մլն 300 հազար դրամ է՝ ստել է, որովհետեւ հայտարարագրում նշված է, որ նա ամսական ստանում է 2 մլն դրամ աշխատավարձ:
Այնուամենայնիվ, այդ հարցը եւս ընդունվեց՝ 68 կողմ ձայներով: Ձեռնպահ քվեարկեց 31, դեմ՝ 5 պատգամավոր:
Հռիփսիմե ՋԵԲԵՋՅԱՆ