«Որոշում է ժողովուրդը: Քվեարկության արդյունքները բոլորիս համար ընդունելի են`լա՞վ, թե՞ վատ: Հիմա ունենք այն, ինչ ունենք: Դժգոհություններ եթե կան, թող դիմեն պատկան մարմիններին`վերահաշվարկի կամ ինչ-որ խախտումների համար»,- խորհրդարանում լրագրողների հետ զրույցում, ամփոփելով դեկտեմբերի 6-ին կայացած սահմանադրական բարեփոխումների արդյունքներն՝ ասաց «Այո»-ի շտաբի պետ, վարչապետ Հովիկ Աբրահամյանը:
Իբրեւ շտաբի ղեկավար՝ Հովիկ Աբրահամյանն ասաց, թե ամեն ինչ արել են, որ արդար ընտրություններ լինեն: Խնդիրներ կան`թող դիմեն պատկան մարմիններին:
Aravot.am-ի հարցին, որ բավական կոշտ գնահատականներ են հնչեցրել նաեւ ԵԽԽՎ-ի եւ «Ժողովրդավարական ընտրությունների եվրոպական պլատֆորմի» դիտորդները, Հովիկ Աբրահամյանն ասաց. «Քննարկում ենք: Դա այդպես չի: Ես տեղյակ եմ, որ ԱԺ-ի պատասխանատուներն աշխատում են իրենց հետ: Արդյունքների մասին առաջիկա 2-3 օրերի ընթացքում կտեղեկացնենք»:
Մեկ այլ հարցի, որ հանրաքվեի արդյունքները դեռ վերջնական չամփոփված, նախօրեին Սերժ Սարգսյանն «ակնհայտ իրականություն» է համարել խորհրդարանական համակարգը, վարչապետն ասաց, որ ԿԸՀ-ի հայտարարած արդյունքների եւ առկա դիմում- բողոքների համամասնությունը հուշում է, որ վերջնական արդյունքները չեն կարող էականորեն տարբերվել: Ինքն էլ, իր եւ շտաբի աշխատանքից գոհ է:
Կարդացեք նաև
Հովիկ Աբրահամյանը մոնտաժված է համարում ընտրակաշառքներ բաժանելու մասին համացանցում առկա տեսանյութերը. «Դուք խոսում եք չստուգված փաստերի մասին: Կստուգվեն, կպարզվեն, մեղավորները կպատժվեն»:
Սերժ Սարգսյանի`2018-ից հետո վարչապետ դառնալու հավանականության մասին հարցին էլ Հովիկ Աբրահամյանը ասաց`«Երբեք մի ասա երբեք»`հիշեցնելով, որ նախագահը հայտարարել է`մինչեւ իր պաշտոնավարման վերջին օրն աշխատելու է:
Այլ մանրամասները`տեսանյութում
Նելլի ԳՐԻԳՈՐՅԱՆ
