Գյումրու նորակառույց Մուշ 2/2 թաղամասում գտնվող թիվ 23 դպրոցի բակում գյումրեցի ակտիվիստ երիտասարդները սահադաշտ են կառուցում: Նպատակը ոչ միայն թաղամասի կյանքն աշխուժացնելը, գյումրեցիներին տնից հանելը ու քաղաքի ձմեռային տխուր ու անգույն երեկոները լուսավորելն է, այլ ստացած հասույթով սոցիալապես անապահով ընտանիքիներին օգնելն է:
Այս մասին Aravot.am-ի հետ զրույցում փոխանցեց «ԱՌՏ» երիտասարդական, բնապահպանական և խորհրդատվական հասարակական կազմակերպության նախագահ, գյումրեցի ակտիվիստ Գոռ Թորոսյանը: «Սահադաշտից ստացված շահույթը ծախսելու ենք բարեգործական նպատակներով՝ հիվանդ երեխաների բուժման համար և սոցիալապես անապահով ընտանիքների կոմունալ վճարումների համար կամ վառելափայտ գնելուն: Գիտեք՝ դրսում սարսափելի ցուրտ է, բայց մենք գիշերուզօր աշխատում ենք . օրեր անց սահադաշտն ամբողջությամբ պատրաստ կլինի: Ասեմ, որ չմուշկները տրամադրել է «Վորլդ Վիժիոն»-ի Գյումրու ՏԶԾ-ը», -ասաց Գոռ Թորոսյանը:
Նունե ԱՐԵՎՇԱՏՅԱՆ
