«Մենք անցյալ տարի չկարողացանք ազգային ներուժը լավագույնս իրացնել, մանավանդ հակասահմանադրական դավադրության դեմ գործողություններում»,- գնահատելով ընդդիմությանն՝ այսօր «Փաստարկ» մամուլի ակումբում հայտարարեց ԱԻՄ առաջնորդ Պարույր Հայրիկյանը`հավելելով, որ այդպիսով ամեն ինչ չի ավարտվում, այլ նոր համագործակցության շրջան է սկսվում: Ինքը հուսով է, որ այն կլինի առավել առարկայական եւ հրապարակային:
Ի դեպ, ԱԻՄ-ն օրերս դատական գործընթաց է սկսելու ԿԸՀ-ի դեմ, որն այդպես էլ չկատարեց օրենքով իրեն վերապահված լիազորությունը եւ արդար, ազատ ու թափանցիկ հանրաքվե չանցկացրեց: ԱԻՄ-ի հաշվարկներով, սահմանադրական հանրաքվեի ժամանակ «այո» է ասել մասնակիցների հազիվ երեսուներկու տոկոսը: Իրենց ուսումնասիրությունները Հայրիկյանը համարում է «գիտական անժխտելի իրողություն»:
Ազատության հրապարակում կայանալիք Հին Նոր Տարվա միջոցառմանը ԱԻՄ-ը հրավիրված է եւ մասնակցելու է`հուսով, որ այդ օրվանից «առողջ քաղաքական ուժերի նոր որակի համագործակցության սկիզբ կդրվի»: ԱԻՄ-ում լավատես են`վստահեցնում է ԱԻՄ առաջնորդը:
Aravot.am-ի հարցին`ի՞նչն է իրենց այդքան լավատեսություն եւ վստահություն ներշնչում, երբ ընդամենը երկու-երեք ամիս առաջ ընդդիմության հերթական համագործակցությունը`ընդդեմ սահմանադրական բարեփոխումների, այդպես էլ չկայացավ, ավելին` հայաստանյան ընդդիմադիր դաշտը տասնամյակներ ի վեր չի հաջողում այդ խնդիրը լուծել: Պարույր Հայրիկյանը չհամաձայնեց մեր վերջին դիտարկման հետ`ասելով, որ 1998 թվականին նախագահ Լեւոն Տեր-Պետրոսյանի հրաժարականը պայմանավորված էր հենց ընդդիմության`1996-ի արդյունավետ համագործակցությամբ: «Այսօր էլ նույն բանն է, բայց քաղաքական ուժերը որոշակի նպատակադրությամբ են գնում համագործակցության, որպեսզի դրանք դոմինանտ չլինեն, հրապարակայնություն է պետք: Հակասահմանադրական դավադրության հարցում աշխատելիս, պիտի գիտակցենք եւ հայտարարենք, որ կա ազգային շահ: Կեղծ հանրաքվեի արդյունքները պետք է չեղյալ հայտարարվեն»,- ասաց Հայրիկյանը: Ի դեպ, ընդդեմ սահմանադրական հանրաքվեի համագործակցության ժամանակ էլ բոլորն, այդ թվում ԱԻՄ առաջնորդը՝ կրկին խոսում էին ազգային շահի գիտակցության մասին: Արդյունքը եղավ «այո»-ի հաղթանակը:
Կարդացեք նաև
«Մենք լուրջ հակասություններ ենք ունեցել, ես խիստ գնահատականներ եմ տվել, բայց տեղ թողնելով»,- ասում է Պարույր Հայրիկյանը`հավելելով, որ «Հանրային փրկության» կամ «Նոր Հայաստան» ճակատից, լավ չի տարբերակում դրանց, երեկ հեռախոսազանգ է ստացել. «Նրանք ցավ էին հայտնում չկայացած համագործակցության համար եւ ուղղակիորեն կամ անուղղակիորեն համագործակցության առաջարկ էին անում: Դա արդեն հուսադրող է: Հուսադրող է նաեւ իմ մոտեցումը`ես ներում եմ այն մարդուն, ով առաջին ընտրություններին մասնակցել է, ինձ է ձայն տվել, իսկ հիմա հայտարարում է`Հայրիկյանն ավելի լավ է թող երգեր գրի»:
Հիշեցնենք, «Ազատություն» ռադիոկայանի հարցին`ինչպե՞ս է վերաբերվում Հայրիկյանի գործունեությանը, ՀԱԿ խմբակցության ղեկավար Լեւոն Զուրաբյանը պատասխանել էր, որ շատ բարձր է գնահատում իր հայրենասիրական երգերը: Aravot.am-ի հետ զրույցում, ի դեպ, Լեւոն Զուրաբյանը հերքեց այն պնդումը, որ ինքը երբեւէ քվեարկել է Պարույր Հայրիկյանի օգտին:
Նելլի ԳՐԻԳՈՐՅԱՆ
