«Մոդուս վիվենդի» կենտրոնի ղեկավար Արա Պապյանի գնահատմամբ, Իրանի՝ պատժամիջոցներից դուրս գալը Հայաստանի համար մեծ հնարավորություններ է ստեղծում, բայց դա դեռ չի նշանակում, որ կարող ենք դրանից օգտվել:
«Օգտվելու համար մտածված, հետևողական, շարունակական քաղաքականություն պետք է իրականացնել»,- այսօր «Հայելի» ակումբում ասաց Արա Պապյանը:
Ըստ նրա, իրանական 600 ընկերությունից 400-ն ազատվել է պատժամիջոցներից, իսկ համաշխարհային շատ ընկերություններ էլ սկսել են վերաբացել իրենց ներկայացուցչությունները Թեհրանում:
Ի՞նչ պետք է անի Հայաստանը, ըստ պատմաբանի. «Մեր գործարարներին պետք է արտաքին գործերի նախարարությունն ուղղորդի, պայմանավորվի իրանական մեծ ընկերությունների հետ, այստեղից գործարարների տանի այնտեղ՝ հանդիպման: Նախարարությունը պետք է նպաստի… Հաշվի առնելով աշխարհագրական դիրքը՝ Հայաստանի դերը կբարձրանա, որովհետեւ դեպի Արևմուտք գնացող միակ հարմար ճանապարհը մնում է Հայաստանը»:
Կարդացեք նաև
Հարցին, թե ՌԴ-ն չի՞ խոչընդոտի ՀՀ-Իրան հարաբերությունների զարգացմանը, պարոն Պապյանն ասաց, թե, ամենայն հավանականությամբ, Հայաստանի դիմումը ՌԴ-ին՝ գազի գնի իջեցման պահանջով, պայմանավորված է հենց նրանով, որ նոր խաղացող է հայտնվել:
Արփինե ՍԻՄՈՆՅԱՆ
