Այսօր ԱԺ նիստում քվեարկության դրվեց Մարդու իրավունքների պաշտպանի ընտրության կարգի մասին հարցը, որով նախատեսվում է, որ ԱԺ պետաիրավական հանձնաժողովում քվեարկեն եւ լիագումար նիստի քննարկմանը ներկայացնեն պաշտպանի թեկնածուին:
Հիմնական զեկուցող, Պետաիրավական հարցերի հանձնաժողովի նախագահ Հովհաննես Սահակյանն ասաց, որ նախագիծն, ըստ էության, փոփոխության չի ենթարկվելու, հենց այդպես դրվելու է քվեարկության:
Սա բարկացրեց պատգամավորներին, որոնք երեկ առաջարկությամբ էին հանդես եկել: ՕԵԿ խմբակցության ղեկավար Հեղինե Բիշարյանի խոսքերով՝ «Երեկ ողջ օրվա նիստի քննարկման առարկան եղել է այս օրենքի նախագիծը: Այսօր ասել, որ առաջարկություններ չեն եղել՝ արդար չէ, ազնիվ չէ: Բոլորս խոսել ենք, մեր տեսակետներն ենք հայտնել: Հանձնաժողովը պետք է ականջալուր լինի»:
«Ժառանգության» պատգամավոր Զարուհի Փոստանջյանի խոսքերով՝ եթե այս նախագիծը փոփոխության չի ենթարկվելու, մենք ժողովրդավար սկզբունքներով չենք գործում: Եթե մեկ մարդ պետք է ներկայացվի ԱԺ լիագումար նիստին, ընտրություն չենք կարողանալու կատարել թեկնածուների միջեւ:
Կարդացեք նաև
Խաչատուր Քոքոբելյանի խոսքերով՝ ակնհայտ է, որ հանձնաժողովում մի թեկնածուի քվեարկությամբ դե ֆակտո ընտրվելու է ՀՀ մարդու իրավունքների պաշտպան, դա թուլացնում է մարդու իրավունքների պաշտպանի ընտրության ինստիտուտը:
Նա կոչ արեց չվախենալ եւ առնվազն երեք թեկնածուի հնարավորություն տալ մասնակցելու:
Ընդդիմության կոչերին չանսալով՝ հարցը դրվեց քվեարկության եւ ընդունվեց 89 կողմ, 16 դեմ, 6 ձեռնպահ ձայների հարաբերակցությամբ:
Հռիփսիմե ՋԵԲԵՋՅԱՆ