Վարչական դատարանում մարտի 2-ին դատավոր Հրաչ Այվազյանի նախագահությամբ շարունակվում էր ոստիկանությունն ընդդեմ Գայանե Առուստամյանի գործի քննությունը:
Դատական նիստի ընթացքում ոստիկանության ներկայացուցիչ Սոնա Մելիքյանը հայտարարեց, որ Գայանե Առուստամյանը ցանկություն չի հայտնել ծանոթանալ ոստիկանության գրանցամատյանի գրառումների հետ եւ այնտեղ չի ստորագրել:
Գայանե Առուստամյանի ներկայացուցիչ Տաթեւիկ Սիրադեղյանը հայտարարեց, որ հակընդդեմ հարցով կողմը խնդրում է ոչ իրավաչափ ճանաչել սուլելու, Գայանե Առուստամյանին չներկայանալու, վիրավորելու, ֆիզիկական միջոցներ ձեռնարկելու կարգի խախտման, ձերբակալման կարգի խախտման, առանց նրա թույլատրությամբ իրեն տեսանկարահանելու ոստիկանության գործողությունները:
Դատարանը որոշեց անցնել գործի դատաքննությանը: Սոնա Մելիքյանը նշեց, որ մայիսի 7-ին ոստիկանությունը կենտրոն վարչական շրջանում ծառայություն էր իրականացնում՝ հասարակական կարգը պահպանելու նպատակով: Սուլելու հնարավորությունը օգտագործելով, սուլելու միջոցով փորձել է կարգավորել փողոցի երթեւեկությունը, այդտեղ ներկա քաղաքացին՝ Գայանե Առուստամյանը, բղավելով սուլող ոստիկանին, ասել է «Այ էշ, ինչի՞ ես սուլում»:
Կարդացեք նաև
Նա ընդգծեց, որ ոստիկանության բաժնից դուրս գալով Գայանե Առուստամյանը լրատվամիջոցների հետ զրույցում պնդել է, որ ոստիկանին ասել ՝ «այ էշ»: Սոնա Մելիքյանը նշեց, որ սուլիչ օգտագործելը օրենքով վերապահված գործառույթ է, հատուկ միջոցների ցանկի մեջ է մտնում. «Եթե անգամ օրենքով լիազորված չլիներ այդ գործողությունը կատարել, չեմ կարծում, որ ոստիկանը կարող էր քաղաքացուն դիմել մորքուր ջան, քույրիկ ջան արտահայտություններով: Ուսուցիչը սուլիչ չի օգտագործում, բժիշկը սուլիչ չի օգտագործում, դատավորն էլ սուլիչ չի օգտագործում, ոստիկանը նման լիազորություն ուներ: Կարելի էր այդպես չարձագանքել, եթե հաշվի առնենք ոստիկանի տարիքը, ապա նա կարող էր, եթե ոչ Գայանե Առուստամյանի որդին, ապա եղբայրը լիներ թո՛ղ ասեր՝ այ տղա, ինչի՞ ես սուլում, ի՞նչ արտահայտություն է «Այ էշ, ինչի ես սուլում»: Չեմ ցանկանում այդ արտահայտությունը բարձրաձայնել, որովհետեւ ամեն անգամ բարձրաձայնելիս, ինքս վիրավորված եմ զգում»:
Սոնա Մելիքյանը նշեց, որ ոստիկանությունը լիազորված է հատուկ միջոցներ կիրառելու գործառույթով, եւ գործառել, եւ ըստ նրա, միայն Գայանե Առուստամյանի պահվածքն է խնդիրներ առաջացրել ձեռնաշղթաները հանելիս. «Նրա պահվածքը ոչ ադեկվատ էր, Գայանե Առուստամյանը ոստիկանությունից դուրս չի եկել այնքան ժամանակ մինչեւ բժշկական բրիգադը չի հայտարարել, որ նրա առողջությանը ոչինչ չի սպառնում: Ոստիկանության անմարդկային վերաբերմունքի վերաբերյալ խոսք անգամ չի կարող լինել»:
Տաթեւիկ Սիրադեղյանը նշեց, որ Գայանե Առուստամյանը արտահայտությունը կատարել է հանկարծակի գալու հետեւանքով եւ նպատակ չի ունեցել վիրավորել ոստիկանին. Արտահայտությունը կատարել է անկախ անձի պաշտոնից եւ դիրքից, չի իմացել, որ սուլողը հանդիսացել է ոստիկանության ծառայող: Նա ասաց, որ այստեղ բացակայում է Գայանե Առուստամյանի մեղքը:
Տաթեւիկ Սիրադեղյանը, ներկայացնելով հակընդդեմ հայցը, ասաց, որ ոստիկանը Գայանե Առուստամյանի արտահայտությունից հետո, ասել է «Էշը դու ես, անասուն», «Տես՝ ինչ եմ անելու» եւ քաշքշել է նրան: Նրան են մոտեցել այլ ոստիկաններ եւ շրջափակել Առուստամյանին, վերջինս էլ վախեցած օգնության է կանչել, սակայն մնացել է անարձագանք եւ զանգել է Արթուր Սաքունցին: Ոստիկանները սկսել են լեզվակռիվ անել, Գայանե Առուստամյանն էլ հայտնել է, որ պետք է նախ ներկայանան եւ ներկայացնեն ձերբակալելու պատճառը: Տաթեւիկ Սիրադեղյանը նշեց, որ, չորս ոստիկան ֆիզիկական ուժ կիրառելով ձերբակալել են նրան: Գայանե Առուստամյանին ասել են «Հիմա կտեսնես, քեզ տանում ենք ինչ անենք» եւ նրա նկատմամբ արժանապատվությունը վիրավորող վերաբերմունք են ցուցաբերել եւ հայհոյելով ոստիկանության բաժին են տարել:
Դատական նիստը հետաձգվեց, հաջորդ դատական նիստը նշանակվեց ապրիլի 19-ին:
Ամի ՉԻՉԱԿՅԱՆ
