Կառավարությունն այսօրվա նիստում հաստատեց Ընտրական նոր օրենսգիրքն ու մի շարք օրենքներում փոփոխություններ ու լրացումներ կատարելու մասին հարցը:
Կառավարության աշխատակազմի ղեկավար-նախարար Դավիթ Հարությունյանը նիստում ասաց, որ Սահմանադրությունը վերջնաժամկետ է սահմանել այս փաթեթի ընդունման համար՝ այս տարվա հունիսի մեկը: Նա նշեց, որ հիմնական բեռը պետք է տեղափոխվի քաղաքական դաշտ, որտեղ քաղաքական ողջ ներկապնակն է ներկայացված: «Այսպիսով, եթե այսօր հաստատում ենք այս փաթեթը, ազդարարում ենք հանրային քննարկումների սկիզբը, որը տեղի կունենա Ազգային ժողովում»,- ասաց նա: Դավիթ Հարությունյանը կառավարության նիստում երկար ներկայացրեց Ընտրական օրենսգրքի նախագիծը:
Անդրադառնալով փաթեթի հիմնական սկզբունքներին՝ Դավիթ Հարությունյանը նշեց, որ դրանք բխում են նոր Սահմանադրությունից:
Ազգային ժողովը պետք է ձևավորվի համամասնական ընտրությունների արդյունքում, մեծամասնական ընտրություններ այլևս չեն սահմանվում:
Կարդացեք նաև
Հաջորդ կարևոր փոփոխությունը Կենտրոնական ընտրական հանձնաժողովի ձևավորումն է, արմատապես փոխվել է դա, սահմանվել, որ ԿԸՀ-ն պետք է ձևավորվի ԱԺ-ի կողմից՝ ապահովելով պատշաճ քաղաքական բալանսը: Զուտ ԱԺ մեծամասնությունը բավարար չէ, որպեսզի ձևավորվի ԿԸՀ-ն:
Նա ասաց, որ էլեկտրոնային հաշվառման համակարգը հնարավորություն է ստեղծում պայքարել առավել շատ մտահոգություն առաջացնող երևույթի դեմ՝ հանրապետությունից բացակայողները չեն կարող քվեարկել:
Հարությունյանը հորդորեց նախագիծը ճանաչել անհետաձգելի, բայց հանրությունը պետք է իմանա, որ քննարկումների համար կա երեք ամիս ժամանակ: Հենց վաղվանից պետք է ձեռնամուխ լինել մանրամասն քննարկումների:
Վարչապետ Հովիկ Աբրահամյանը նշեց, որ հաստատում են նախագիծը, առջևում ծավալուն աշխատանք է սպասվում:
Նելլի ԲԱԲԱՅԱՆ