«Սա կարելի է անվանել էլիտար հեղափոխության փորձ։ Այսինքն՝ էլիտայի փոփոխությունը կամ վերախմբավորումը: Այն կարելի է անվանել ռեստրուկտուրիզացիա, կամ այլ բան։ Քիչ թե շատ հասկանալի է, թե սա ինչ գործընթաց է։ Այն սկսվել է 2010-2011 թվականներին, երբ լուրջ փոփոխություններ եղան հայկական էլիտայում։ Հետո Հովիկ Աբրահամյանի գալուց հետո գործընթացը կասեցվեց, ընդմիջում եղավ»,- «Հայելի» ակումբում, անդրադառնալով ներքաղաքական վերջին փոփոխություններին եւ պաշտոնանկություններին, ասաց «Կովկաս» ինստիտուտի տնօրեն Ալեքսանդր Իսկանդարյանը։
Անդրադառնալով այսօր Հայաստանում տիրող ներքաղաքական վիճակին՝ Ալեքսանդր Իսկանդարյանը նշեց, որ Հանրապետական կուսակցությունը բոլոր ոլորտները պահում է իր վերահսկողության տակ, իսկ լուրջ ընդդիմություն նրանք չունեն։ «Եթե նման իրավիճակներ են լինում, իշխող կուսակցության ներսում են հակասություններ ստեղծվում։ Կուսակցությունում գտնվող տարբեր խմբակցություններ իրար դեմ են դուրս եկել»։
Նա կարծիք հայտնեց, որ վերջին փոփոխություններով փորձ է արվում օլիգարխներին հանել քաղաքականությունից. «Սա չի նշանակում, որ օլիգարխները դադարում են օլիգարխներ լինել։ Նրանք կշարունակեն բիզնեսներն իրար միջեւ կիսել։ Իսկ քաղաքականությունում հաղթում է այն հոսանքը, որոնց ես կանվանեի բյուրոկրատներ կամ չինովնիկներ»։
Քաղաքագետը չգիտի, թե ինչ ճակատագիր կունենա այս փորձը, քանի որ նման փոփոխությունները շատ դժվար են. «Իշխանություններն արտաքին ուժերի հետ չեն պայքարում։ Նրանք հենց իրենց դեմ են պայքարում։ Հասկանալի է, թե ինչու է սա հիմա տեղի ունենում։ Սերժ Սարգսյանի ձեռքերն ինչ-որ չափով ազատ են։ Բոլոր ընտրություններն անցան, հանրաքվեն անցավ, փոխվում է կառավարման համակարգը։ Նախապատրաստվում է Սերժ Սարգսյանի հեռանալը»։
Կարդացեք նաև
Աշոտ ԻՍՐԱԵԼՅԱՆ
