Վրաստանի վարչապետ Գեորգի Կվիրիկաշվիլիի տեղեկություններով՝ «Վրացական երազանք» կոալիցիայի քաղաքական խորհուրդը աջակցում է նախաձեռնությանը, որով առաջարկվում է կատարել սահմանադրական փոփոխություն։ Փոփոխությամբ երկրի Մայր օրենքում պետք է ամրագրվի, որ ամուսնությունը տղամարդու և կնոջ միությունն է։ Այս մասին տեղեկացնում է Грузия Online լրատվական կայքը։
Վրաստանի վարչապետը հայտնել է նաև, որ այդ նախաձեռնությանը դեմ է Հանրապետական կուսակցությունը, սակայն հանրապետականները դեմ են ոչ թե նախաձեռնության բովանդակությանն, այլ դրա իրականացման գործընթացին։
Վարչապետ Կվիրիկաշվիլիի պնդմամբ, կոալիցիոն կառավարությունը դեմ է ցանկացած տեսակի խտրականություններին։ Անդրադառնալով այս նուրբ թեմային՝ Վրաստանի կառավարության ղեկավարն ասել է. «Մենք ևս մեկ անգամ հաստատում ենք կոալիցիայի ընդգծված հավատարմությունը սկզբունքներին, որոնք ենթադրում են խտրականության անընդունելիությունն ու դրա արմատախիլ լինելը ցանկացած ոլորտում։ Մենք հանդես ենք գալիս նախաձեռնությամբ, որպեսզի պաշտպանության տակ առնենք արժեքներ, որոնց շարքին է դասվում ամուսնությունը»։
