«Ցուցակների հրապարակման վերաբերյալ Վենետիկի հանձնաժողովի ներկայացուցիչների կողմից տարաբնույթ մեկնաբանություններ են եղել, իրավունքների հետ կապված որոշակի հարցեր են նշվում: Այդ հարցը նաև մեզ է հուզել, թե իրենց վերաբերմունքն ինչպիսին է այդ հարցի վերաբերյալ, մենք հարցրել ենք»,- խորհրդարանում լրագրողների հետ զրույցում ասաց ԲՀԿ խմբակցության քարտուղար Վահե Էնֆիաջյանը`Վենետիկի հանձնաժողովի եւ ԵԱՀԿ ԺՄԻԳ-ի փորձագետների հետ հանդիպումից հետո:
Իսկ թե ի՞նչ են պատասխանել փորձագետները, ԲՀԿ քարտուղարն ասաց, որ չի փորձի նրանց փոխարեն պատասխանել:
ԲՀԿ-ի ներկայացուցիչներն անդրադարձել են նաեւ դիտորդների, լրատվամիջոցների մուտքը ընտրատեղամասեր սահմանափակելուն: «Տեղեկացրել ենք, որ իշխանության ներկայացուցիչներ էլ կան, որոնք կարծում են, թե այստեղ թյուրիմացություն կա»,-ասաց նա:
ԲՀԿ-ականները խոսել են նաեւ մատների թանաքոտման հարցի մասին: «Սա էլ է տարբերակ , մոտեցում, որը կարելի է քննարկման առարկա դարձնել: Մոտեցումները տարբեր են, կան պետություններ, որ այս մոտեցումը մի քիչ ժամանակակից չեն համարում, այսպես ձեւակերպենք, եւ կարելի է ավելի ժամանակակից ձեւակերպել, այնուամենայնիվ, արտասահմանի փորձն ինչքան էլ մենք ուսումնասիրենք ու փորձենք կիրառել մեր երկրում, մենք պետք է հաշվի առնենք մեր երկրի առանձնահատկությունն ու նախկին դրսևորումները»,- ասաց Վահե Էնֆիաջյանը:
Կարդացեք նաև
Նելլի ԳՐԻԳՈՐՅԱՆ
