Այսօր ԱԺ պաշտպանության, ազգային անվտանգության եւ ներքին գործերի մշտական հանձնաժողովը «Կիբերանվտանգության ոլորտի զարգացումը ՀՀ-ում. հատվածային կարգավորումներից դեպի ռազմավարություն» թեմայով միջազգային սեմինար էր կազմակերպել:
Ազգային անվտանգության ծառայության բաժնի պետի տեղակալ Արսեն Գաբրիելյանն ասաց, որ ՀՀ-ում տեղեկատվական համակարգերի եւ հեռահաղորդակցման ցանցերի զարգացման ուղղությամբ մեծ աշխատանք է տարվում. «Պետական մարմիններում լայն կիրառություն են ստանում այնպիսի տեղեկատվական համակարգերը, որոնց միջոցով հավաքվում եւ մշակում են ինչպես հանրամատչելի, այնպես էլ սահմանափակ հասանելիության տեղեկատվություն: Այդ տեղեկատվության պահպանումը հարձակումներից բխում է ինչպես անձի, այնպես էլ պետության շահերից»:
Խոսելով կիբերհանցագործությունների սպառնալիքների եւ հնարավոր ոտնձգությունների թիրախների մասին՝ Արսեն Գաբրիելյանն ասաց, որ առանձնակի ուշադրություն են դարձնում առանձին պետությունների հատուկ ծառայությունների կամ հաքերային խմբերի կողմից նպատակային, նեղ մասնագիտական կիրառություն ունեցող վնասաբեր ծրագրերի ստեղծման եւ օգտագործման միտումների վրա.
«Նախորդ տարում, ընդհանուր առմամբ, կատարվել էր մոտ 1 մլն հաքերային հարձակումներ եւ պետական մարմիններում վիրուսների ներդրման բազմաթիվ փորձեր, որոնց մեծ մասը՝ Ցեղասպանության 100-րդ տարելիցի օրերին»:
Կարդացեք նաև
Հռիփսիմե ՋԵԲԵՋՅԱՆ
