ՀՀ Արտաքին գործերի նախարար (1996-1998 թթ-ին), ՀՀ ԱԺ «Ժառանգություն» խմբակցության պատգամավոր Ալեքսանդր Արզումանյանը տեղեկացրեց, որ ժամանակավոր հրադադարը հաստատվել է Կարմիր խաչի միջնորդությամբ:
«Մեդիա կենտրոնում» հրավիրված քննարկմանը պարոն Արզումանյանը մանրամասնեց. «Կարմիր խաչը դա միջնորդել է, քանի որ բազում ադրբեջանական դիակներ կան այն տարածքներում, որոնք ետ է վերցվել ԼՂՀ ՊԲ կողմից: Հնարավորություն է տրվում, որ ադրբեջանական կողմը ետ վերցնի իր դիակները: Դա նաև ցույց է տալիս, որ ԼՂՀ ՊԲ-ն հավատարիմ է միջազգային հումանիտար իրավունքի բոլոր պահանջներին. չի ռմբակոծում խաղաղ բնակչությանը ի տարբերություն Ադրբեջանի և առաջնորդվում է Ժնևյան կոնվենցիայի սկզբունքներով: Հրադադարը պատասխան է ադրբեջանական կողմի խնդրանքին, քանի որ մեծ հաշվով Ադրբեջանը փորձեց անակնկալի բերել և նպատակը տարածքներ վերցնելն էր, որ արդարացնի այս ավանտյուրան: Բայց ետ մղվեցին բոլոր ուղղություններով և կրեցին կորուստներ»:
Ըստ Ալեքսանդր Արզումանյանի` այժմ վտանգավորն այն է, որ խոսվում է զինադադարի նոր պայմանագրի մասին. «Ադրբեջանը խախտել է 1994-ին կնքված պայմանագիրը, ուստի կամ պետք է վերադառնա գործող պայմանագրին, կամ նոր պայմանագիր ստորագրվի ԼՂՀ-ի և Ադրբեջանի միջև: Այստեղ ՀՀ-ն անելիք չունի»:
ՀՀ Արտաքին գործերի նախարար (1993 – 1996 թթ-ին) Վահան Փափազյանն այսօր մեկ հիմնական խնդիր է տեսնում. «Եթե դեռ կան հակառակորդի կողմից օկուպացված տարածքներ, դրանք պետք է ետ բերել: Այն վիճակը, որ կար ճակատում մինչև ապրիլի 1-ը, պիտի ամբողջությամբ վերականգնվի, և եթե հնարավոր է, պետք է բարելավվի մեզ համար: Մնացածը ես այս պահին համարում եմ անիմաստ»:
Կարդացեք նաև
Իսկ դիվանագիտական տեսանկյունից՝ պարոն Փափազյանի համար ամենակարևորն է վերականգնել բանակցությունների եռակողմ ձևաչափը:
Տաթև ՀԱՐՈՒԹՅՈՒՆՅԱՆ
Լուսանկարը` «Մեդիա կենտրոն»-ի
