«Հասկանում ենք` թվային տեխնոլոգիաները շատ ռիսկեր են բացառում, բայց նաեւ շատ հարցեր են առաջացնում, օրինակ` ովքե՞ր են մասնագիտական հմտություններով կարողանալու կիրառել այդ սարքերը եւ ծրագրերը»,-«Կոնգրես» հյուրանոցում Ընտրական օրենսգրքի նախագծի քննարկման ժամանակ լրագրողների հետ զրույցում ասաց ԱԺ ԲՀԿ խմբակցության պատգամավոր Վահե Էնֆիաջյանը: Նա նշեց, որ ընդդիմությունն առաջարկում է չսահմանափակել ընտրատեղամասերում լրագրողների, հ/կ-ների եւ դիտորդական կառույցների ներկայացուցիչների թիվը:
«Առաջարկում ենք նաեւ հրապարակել, թե որ ժամանակահատվածում է ընտրողը գրանցում ստացել, որովհետեւ ընտրություններից հետո մենք տեղեկություններ ենք ստանում, որ տասնյակ մարդիկ կարողացել են կարճ ժամանակում գրանցում ստանալ: Օրինակ, եթե մի համայնքում ընտրություններից առաջ միանգամից 100 մարդ է գրանցվում, մտահոգիչ չէ՞… Տվյալ անձինք կարող են հաշվառված լինել նաեւ այլ տեղում եւ հանդես գալ կողմնակալ քվեարկությամբ, այսինքն` երկու տեղում գրանցված լինեն»,-ակնարկեց Էնֆիաջյանը` հավելելով, որ նման դեպքեր գրանցվել են:
Լուիզա ՍՈՒՔԻԱՍՅԱՆ
Կարդացեք նաև
