Սերգեյ Լավրովը Վիեննայում Սարգսյան-Ալիեւ հանդիպումից հետո խոսում էր փոխզիջումների մասին, որ եւ Բաքուն, եւ Երեւանը պատրաստ են զիջումների: Նա իր հայտարարություններում Կազանյան փաստաթուղթն է մատնանշում:
Այսօր Aravot.am-ը ԱԺ արտաքին հարաբերությունների հանձնաժողովի նախագահ Արտակ Զաքարյանին հարցրեց՝ հնարավո՞ր է նոր բանակցությունների հիմքը դառնա հենց այդ փաստաթուղթը, որը մատնանշում է Լավրովը՝ պատասխանեց. «Մենք այսօր քննարկում ենք մեկ խնդիր՝ լիարժեք երաշխավորված հրադադարի պահպանման խնդիրը եւ համապատասխան մեխանիզմների խնդիրը, որը զերծ կպահի Բաքվին ապագա ագրեսիվ գործողություններից, ռազմատենչ գործողություններից: Որ պահին որ ես ինքս կարդամ, լսեմ պաշտոնական հայտարարություններ Բաքվի կողմից արված, որտեղ Ալիեւը խոսում է ԼՂՀ ինքնորոշման իրավունքի իրացման մասին, այն ժամանակ ես կսկսեմ հավատալ նաեւ հնարավոր փոխզիջումների տարբերակին»:
Մենք ճշտեցինք՝ ի՞նչ փոխզիջումների մասին է խոսքը՝ Արտակ Զաքարյանը պատասխանեց. «Ես հիմա փոխզիջում տեսնում եմ Բաքվում, ես սպասում եմ Բաքվում փոխզիջում»:
Նախագահների հանդիպումը Արտակ Զաքարյանը ձեռքբերում է համարում՝ «սառույցը տեղից շարժվեց». «Ես ձեռքբերում եմ համարում այն, որ համանախագահող երկրների հայտարարության մեջ հստակ ամրագրված է հրադադարի ռեժիմի պահպանման մեխանիզմների ներդրման անհրաժեշտությունը: Սա է այսօրվա ծրագիրը, մնացածի մասին պետք է խոսել միայն ապառնի ժամանակով: Երբ հետաքննման մեխանիզմները ներդրվեն, տրամաբանական կլինի արդեն հասցեական հայտարարություններ անելը, թե ով է հրադադարի ռեժիմը խախտելը»:
Կարդացեք նաև
Մեր հարցին՝ հնարավորություն տեսնո՞ւմ եք, որ Ղարաբաղը վերադառնա բանակցային սեղանի շուրջ՝ նա պատասխանեց. «Այո, ոչ միայն տեսնում եմ, դա նաեւ անհրաժեշտություն է»:
Հռիփսիմե ՋԵԲԵՋՅԱՆ
