«ԼՂ խնդիրը Ադրբեջանի համար տարածքներ նվաճելու հարց է, իսկ Լեռնային Ղարաբաղում ապրող հայերի համար՝ կյանքի իրավունքի հարց: Այստեղ է, որ մենք իրար չենք հասկանում: Ահա թե ինչու միջնորդները պետք է առավել ջանքեր գործադրեն ու հատկապես խաղաղապահ բնույթի միջնորդություն իրականացնեն, նաեւ որովհետեւ գիտենք, թե որ կողմն է առավել խախտում հրադադարը»,- այսօր «Ռուսաստանի միջնորդության հեռանկարները Լեռնային Ղարաբաղի հակամարտության կարգավորման հարցում» թեմայով Երեւան–Մոսկվա–Բաքու տեսակամրջի ժամանակ ասաց ԱԺ պատգամավոր Խոսրով Հարությունյանը:
Հեռուստակամրջին մասնակցում էին Ադրբեջանի Միլի Մեջլիսի պատգամավոր, քաղաքագետ Ռասիմ Մուսաբեկովը, Բաքվի բազմամշակութայնության միջազգային կենտրոնի խորհրդական, քաղաքագետ Թոֆիկ Աբասովը:
Հաշվի առնելով այն հանգամանքը, որ Հարավային Կովկասը գտնվում է Ռուսաստանի աշխարհաքաղաքական հետաքրքրությունների շրջանակում, Խոսրով Հարությունյանը ՌԴ-ի միջնորդի, ավելի ճիշտ՝ մոդերատորի դերը բնական է թե Հայաստանի, թե Ադրբեջանի համար: Իհարկե, դա, ըստ բանախոսի, չի կարող բացառել այլ միջնորդների ջանքերն ու կատարած աշխատանքը:
«Միևնույն ժամանակ եթե խոսում ենք միջնորդ դերի մասին, պետք է հասկանանք, ինչում է կայանում այդ միջնորդության դերը: Ռուսաստանը անում էր ամեն ինչ, որ կողմերի միջեւ ռազմական հավասարակշռությունը պահպանվեր, բայց պարզվեց, որ դա քիչ է: Այս ռազմական լարվածության մեծացումը շփման գծում կարող է վերածվել մեծ աղետի ոչ միայն կողմերի, այլ նաեւ տարածաշրջանի համար, ահա ինչո՞ւ է շատ կարեւոր խաղաղություն հաստատելու միջնորդության դերը»,- ասաց Խոսրով Հարությունյանը:
Կարդացեք նաև
Նելլի ԳՐԻԳՈՐՅԱՆ
