Այս սեզոնին աղիքային հիվանդությունների հիմնական պատճառն առանց լավ լվանալու միրգ, բանջարեղեն, կանաչեղեն օգտագործելն է, սնունդը համապատասխան ջերմային ռեժիմում չպահպանելը եւ այլն: Այսօր այս մասին ասաց «Նորք» ինֆեկցիոն հիվանդանոցի գլխավոր ինֆեկցիոնիստ Մելանյա Շմավոնյանը:
Բժիշկ Շմավոնյանը «Հայելի» ակումբում ներկայացնելով այս օրերին տիրող իրավիճակը՝ ասաց, որ աղիքային խնդիրներով հիվանդանոցներ դիմողների թիվն ավելացել է, թեեւ կան նաեւ աղիքային վարակներով, վիրուսային ինֆեկցիաներով հիվանդներ:
Նա խորհուրդ տվեց ձեռքերը լավ լվանալ, ամռանը շուտ փչացող սննդամթերք չուտել, օգտվել սննդի այնպիսի կետերից, որոնք պահպանում են հիգիենայի կանոնները:
Օբյեկտների ղեկավարներին էլ հորդորեց` սննդի հետ աշխատող աշխատակիցների առողջությանը եւ հիգիենային հետեւել, որպեսզի խուսափեն նման դեպքերից:
Մելանյա Շմավոնյանի խոսքերով, այս տարի չեն արձանագրվել աղիքային վարակվածության զանգվածային դեպքեր, ինչպես որ նախորդ տարի: Բժշկի կարծիքով, այս տարի վերահսկողությունն ավելի լավ է իրականացվում:
«Հիմնականում բոլոր աղիքային վարակների հետ կապված հիվանդությունները կոչվում են կեղտոտ ձեռքերի հիվանդություն»,-ասաց տիկին Շմավոնյանը` նշելով, որ օրական երկու-երեք մեծահասակ հիվանդ են ընդունում: Բժիշկը նկատեց, որ երեխաներն ավելի զգայուն են եւ ավելի հաճախ են հիվանդանում. «Պետք է ուտել թեթեւ սննդամթերք, թարմ պատրաստված բանջարեղեն, միրգ եւ շատ հեղուկ օգտագործել»,-հորդորեց նա:
Լուսինե ԲՈՒԴԱՂՅԱՆ
