Վրաստանի կառավարության հերթական նիստում այդ երկրի վարչապետ Գեորգի Կվիրիկաշվիլին անդրադարձել է ԱՄՆ պետքարտուղար Ջոն Քերիի՝ Վրաստան կատարած վերջին այցին։ Այս մասին տեղեկացնում է Грузия Online լրատվական կայքը։
Խոսելով ԱՄՆ արտաքին քաղաքական գերատեսչության ղեկավարի՝ Թբիլիսի կատարած այցելության մասին՝ Կվիրիկաշվիլին ասել է. «Քերիի այցը կոնկրետ արդյունքներ բերեց։ Դա շատ հաջող այց էր։ Մենք շատ օգտակար զրույց ունեցանք։ Կարևոր է, որ այցը կայացավ Վարշավայում մեկնարկող ՆԱՏՕ-ի գագաթաժողովից առաջ, ինչը ևս մեկ անգամ ապացուցում է մեր պետության որդեգրած եվրաինտեգրման ծրագրերի աջակցությունը»։
Կվիրիկաշվիլին հատկապես կարևորել է այն հանգամանքը, որ ձեռք բերված պայմանավորվածությունների արդյունքում կխորացվեն երկու պետությունների հարաբերությունները նաև կրթության ոլորտում։
Տեղեկացնենք, որ հուլիսի 7-ի առավոտյան ԱՄՆ պետքարտուղար Քերին Թբիլիսիից ուղևորվել է Կիև։