Aravot.am-ին որոշ մանրամասներ են հայտնի դարձել երեկ, Ախալքալաքի շրջանի Վաչիանի գյուղում կատարված հայ ընտանիքի սպանությունից:
Հիշեցնենք, Վրացական «Ռուսթավի-2» հեռուստաընկերության փոխանցմամբ, հայտնաբերվել են 37-ամյա կնոջ եւ նրա երեք երեխաների մարմինները` 5-ամյա տղայի, 16 եւ 18 –ամյա աղջիկների: Ընտանիքի հայրը մեկնել է արտագնա աշխատանքի:
Վրացական «Իմեդի» հեռուստաընկերությունն էլ տեղեկացրել է, որ նրանց տանջել են, ենթարկել բռնության: Տնից թանկարժեք իրերը չեն գողացել:
Հայաստանում Վրաստանի դեսպանատան մեր աղբյուրների փոխանցմամբ՝ այս գործով արդեն ձերբակալված է հայ երիտասարդ, ծնված 1990թ.: Քննարկվող հիմնական վարկածը բռնաբարությունն է: Վրացական ոստիկանությունը նաեւ գողության վարկածն է քննարկում, բայց այն շատ թույլ է: Ձերբակալված երիտասարդին ոստիկանությունը տեղափոխել է Թբիլիսի, որպեսզի գյուղի բնակիչները հաշվեհարդար չտեսնեն:
Կարդացեք նաև
Նելլի ԳՐԻԳՈՐՅԱՆ
Հ. Գ. Հայաստանի ԱԳՆ-ն կատարվածի վերաբերյալ տարածել է հետեւյալ հաղորդագրությունը. «Հայտնում ենք, որ Ախալքալաքի շրջանի Վաչիան գյուղում տեղի ունեցած ողբերգական սպանության կապակցությամբ Վրաստանում ՀՀ դեսպան Յուրի Վարդանյանը հեռախոսազրույցներ է ունեցել Սամցխե-Ջավախեթիի նահանգապետ Ակակի Մաչուտաձեի և ոստիկանապետ Թեյմուրազ Կալանդաձեի հետ: Ինչպես հայտնել է վրացական կողմը, դեպի առնչությամբ իրականացվում է հետաքննություն, կասկածյալը ձերբակալվել է:
ՀՀ դեսպանությունը մշտական կապի մեջ է Վրաստանի իրավապահ մարմինների հետ և ուշիուշով հետևում է զարգացումներին:
Մեր խորին ցավակցությունն ենք հայտնում սպանվածների հարազատներին և բարեկամներին»:
