Ինչպես հայտնի է, Գեւորգ Սաֆարյանի գործով հուլիսի 19-ին կայանալիք դատական նիստը հետաձգվել է, քանի որ դատարանը չի պահանջել ամբաստանյալ Սաֆարյանի ներկայությունը: Փաստաբան Տիգրան Հայրապետյանը Aravot.am-ին հայտնել էր, թե պատրաստվում է գնալ դատարան՝ պարզելու համար Մնացական Մարտիրոսյանի՝ նման որոշման պատճառները:
Aravot.am-ը փաստաբանից հետաքրքրվեց, թե արդյոք պարզե՞լ է որոշման պատճառները, Տիգրան Հայրապետյանը պատասխանեց. «Գնացի դատարան, դատավորն եկավ, ասաց, որ դատական նիստը հետաձգվում է Գեւորգ Սաֆարյանի ներկա չլինելու պատճառով, հաջորդ նիստը կլինի հուլիսի 28-ին եւ միանգամից գնաց, չհասցրեցի հետաքրքրվեմ, թե որն էր պատճառը: Այսինքն՝ երեք նիստ հետաձգվեց. պետք է լիներ 23-ին, 25-ին, 26-ին: Փաստորեն, անհիմն այդ բոլոր նիստերը հետաձգվեցին»:
Հիշեցնենք, որ «Հիմնադիր Խորհրդարան»-ի անդամ, քաղաքացիական ակտիվիստ Գեւորգ Սաֆարյանը հունվարի մեկին բերման էր ենթարկվել Ազատության հրապարակից` «Հիմնադիր Խորհրդարան»-ի անդամների եւ ոստիկանների միջեւ տեղի ունեցած միջադեպի պատճառով: Նա մեղադրվում է ոստիկանության մայոր Գեղամ Խաչատրյանին հարվածելու համար:
Ամի ՉԻՉԱԿՅԱՆ
