Հուլիսի 29-ին Սարի թաղում տեղի ունեցած միջադեպի ժամանակ` ոստիկանական ուժերի կողմից նետված պայթուցիկ նյութերից տուժած 1in.am կայքի լրագրող Մարիամ Գրիգորյանին (վնասվածքները` լուսանկարում) քննիչն ասել է, թե միջադեպի փաստով նա որպես վկա է ներգրավված:
Այս մասին այսօր «Մեդիա Կենտրոնում» կայացած քննարկման ժամանակ հայտնեց Մարիամը` ներկայացնելով քննիչի համապատասխան գրությունը (լուսանկարը` Մարիամ Գրիգորյանի «ֆեյսբուքյան» էջից):
«Քննիչն ասաց, որ պարտադիր պետք է ցուցմունք տամ: Եթե հրաժարվեմ` քրեական պատասխանատվության եմ ենթարկվելու»,-ասաց Մարիամը եւ հավելեց, որ հրաժարվել է ցուցմունք տալ: Նույն գրությունն ուղարկվել է նաեւ նույն գործողություններից տուժած 1in.am-ի օպերատոր Դավիթ Հարությունյանին:
«Սա է տեռորիզմը: Պետք է բոյկոտել քննչական մարմիններին, քանի դեռ լրագրողների գործը չի հետաքննվել եւ մեղավորները չեն պատժվել: Լրագրողը վիրավոր ոտքով հայտնվում է քննիչի մոտ, իսկ նա չի հարցնում` ո՞վ է քեզ այդ օրը գցել` քո մասնագիտական գործունեությունն իրականացնելու ժամանակ: Նրանք միայն հետաքրքրվում են, թե իրավապահներից ով է հայհոյանք ստացել»,- մեկնաբանելով կատարվածը` ասաց «Խոսքի ազատության պաշտպանության կոմիտեի նախագահ» Աշոտ Մելիքյանը:
Կարդացեք նաև
«Շարադրանքում սպառնալիք կա` եթե չստորագրես…»: Չեմ բացառում, որ մյուս տուժած լրագրողներին եւս նման թղթեր առաջադրեն: Կոչ եմ անում չստորագրել: Ստացվում է, որ լրագրողների ձեռքով պատկերը դառնալու է այնպիսին, ինչպիսին ցանկանում է ոստիկանությունը, ինչն անթույլատրելի է»,- իր հերթին նշեց «Լրագրողներ հանուն ապագայի» հ/կ նախագահ Սուրեն Դեհերյանը:
«Հայաստանի Հելսինկյան կոմիտեի նախագահ», իրավապաշտպան Ավետիք Իշխանյանը լրագրողական համայնքին առաջարկեց դիմել Մարդու իրավունքների եվրոպական դատարան, քանի որ ոստիկանները խախտել են Մարդու իրավունքների միջազգային կոնվենցիայի մի շարք կետեր:
Իշխանյանը վստահ է, որ ոչ մի ոստիկան չի պատժվելու: Աշոտ Մելիքյանն էլ կարծում է, որ որոշ ոստիկանների նկատողություն կտան` համարելով, որ այդպես պատասխանատվության են ենթարկում:
Լուիզա ՍՈՒՔԻԱՍՅԱՆ
