Այն ընթացքում, երբ «Ժառանգություն» կուսակցության ներկայացուցիչներ Արմեն Մարտիրոսյանը, Հովսեփ Խուրշուդյանը եւ Դավիթ Սանասարյանը դեռ ազատազրկված էին, «Ժառանգություն» կուսակցությունը հայտարարություն տարածեց, որ աշնանը հանրապետությունում կայանալիք ՏԻՄ ընտրություններին չի կարող մասնակցել: Այժմ նշյալ անձինք արդեն ազատ են արձակվել`գրավի դիմաց: Այսօր «Նոյյան Տապանում» հրավիրված մամուլի ասուլիսում լրագրողները Դավիթ Սանասարյանից եւ Հովսեփ Խուրշուդյանից հետաքրքրվեցին`հնարավո՞ր է «Ժառանգությունում» վերանայեն ՏԻՄ-երին իրենց մասնակցությունը: Դավիթ Սանասարյանն ասաց, որ երեկոյան վարչության նիստ է լինելու, այդ հարցով որոշում կկայացվի:
Ավելի վաղ հայտարարություն էր հնչել նաեւ այդ ընտրություններում ընդդիմադիր որեւէ ուժի սատարելու մասին: Aravot.am-ի հստակեցնող հարցին`ավելի հավանակա՞ն է այդ տարբերակը, Դավիթ Սանասարյանը պատասխանեց, որ երեկոյան նիստում որոշում կկայացվի:
Հովսեփ Խուրշուդյանն էլ լրագրողներին տեղեկացրեց, որ Արեւելյան գործընկերության ֆորումը ՊՊԾ գնդի գրավման եւ դրան հետեւած իրադարձությունների ուսումնասիրության համար փաստահավաք խումբ է ուղարկել Հայաստան: Մեկ շաբաթից կհրապարակվի նրանց եզրակացությունը: Հովսեփ Խուրշուդյանի կարծիքով, իր մեկամսյա կալանքի փաստն ավելի մեծ վնաս հասցրեց իշխանությանը եւ Հայաստանին, քանզի միջազգային այն կառույցները, որոնց հետ ինքը համագործակցությունների մեջ է, առավել շահագրգիռ են հետեւել հայաստանյան գործընթացներին:
Բանախոսները ողջունում են առաջիկայում հնարավոր համաներման փաստը, բայց այն կարծիքին են, որ ՊՊԾ գնդի գրավման արդյունքում զարգացած հետագա քաղաքական գործընթացների առիթով ձերբակալվածների գործերը պետք է կարճվեն` հանցակազմի բացակայության պատճառով. «Ոչ ոք չի սպասում Սերժ Սարգսյանի շնորհին»:
Կարդացեք նաև
Թե Հովսեփ Խուրշուդյանը, թե Դավիթ Սանասարյանն ասացին, որ կալանավայրերում իրենց նկատմամբ վերաբերմունքից դժգոհ չեն: Նրանք նաեւ կոչ են անում դեռ կալանավայրում գտնվող Անդրիաս Ղուկասյանին հացադուլը դադարեցնել. դա արդեն վտանգավոր է դառնում:
Բանախոսները նաեւ վստահ են`«Սասնա ծռերն» իրենց գործողություններով կասեցրեցին հողերի վերադարձի հարցը: Դավիթ Սանասարյանը նույնիսկ տեղեկություններ ունի Ղարաբաղից. «Կուլիսներում «Սասնա ծռերի» կենացն էին խմում, նրանք կասեցրեցին հողերի հանձնելու գործընթացը»:
Նելլի ԳՐԻԳՈՐՅԱՆ
