Ոստիկանության ՊՊԾ գունդը գրաված «Սասնա ծռեր» խմբավորման անդամներին սնունդ տարած Արթուր Սարգսյանի պաշտպան Դավիթ Գյուրջյանը քիչ առաջ լրագրողներին հայտնեց, որ վերաքննիչ քրեական դատարանը որոշում է կայացրել վերաքննիչ բողոքը ամբողջությամբ մերժել: Նա ընդգծեց, որ նաեւ մերժվել է բողոքում առկա գրավի մասը, հիմնավորումներ չեն ներկայացվել:
Արթուր Սարգսյանը ներկա չի եղել որոշման հրապարակմանը:
«Այս գործընթացի զավեշտալի էությունը հենց նրանում է կայանում, որ մեղադրանքը կալանավորումից հետո փոփոխվել է եւ դա պետք է հիմք հանդիսանար վերանայման համար: Կալանավորման ժամանակ կասկածը մեկ այլ հանցագործության կատարման կապակցությամբ էր, հետագայում վերաորակվել է այդ արարքը, հետեւաբար պետք է վերանայվի նաեւ դրա արդյունքում ընտրված խափանման միջոցը: Այս բոլոր հիմնավորումները վերաքննիչ դատարանին ներկայացրել ենք, սակայն դրանք փաստացի հաշվի չեն առնվել: Մեղադրանքը փոփոխվել է եւ հիմա մեղադրանք է առաջադրված զենք պահելուն եւ կրելուն օժանդակելու մեջ, ինչպես նաեւ պատանդներ պահելուն օժանդակելու մեջ»,- ասաց Դավիթ Գյուրջյանը:
Ամի ՉԻՉԱԿՅԱՆ
