Deutsche Welle մեդիակորպորացիան Անկարայի դատարան քաղաքացիական հայց է ներկայացրել Թուրքիայի իշխանությունների դեմ: DW-ի կայքում նշվում է, որ պատճառը՝ ընկերության Conflict Zone հաղորդման համար Թուրքիայի երիտասարդության և սպորտի նախարար Աքիֆ Չաղաթայ Քըլըչի հետ հեռուստահարցազրույցի առգրավումն է
Գերմանական ընկերությունից հայտնել են, որ նախարարի հետ հարցազրույցն արվել է սեպտեմբերի 5-ին: Սակայն ձայնագրությունից անմիջապես հետո նախարարության մամուլի քարտուղարը հայտարարել է, որ DW-ին արգելվում է հրապարակել զրույցը:
Նկարահանված բոլոր նյութերն առգրավվել են և այդպես էլ չեն վերադարձվել լրագրողներին:
Հաղորդվում է, որ Քըլըչի հետ հարցազրույցում քննարկվել է հուլիսի 16-ի գիշերը Թուրքիայում տեղի ունեցած հեղաշրջման փորձը, դրան հաջորդած զանգվածային ձերբակալությունները, ինչպես նաև Թուրքիայում խոսքի ազատության ոլորտում տիրող իրավիճակը և թուրք հասարակության մեջ կանանց դրությունը:
Կարդացեք նաև
Մեդիակորպորացիայի գլխավոր տնօրեն Պետեր Լիմբուրգը հայտարարել է, որ Թուրքիայի իշխանությունների գործողությունները «որևէ ընդհանուր բան չունեն օրենքի գերակայության սկզբունքի և ժողովրդավարության հետ»:
Պատրաստեց Վիկտորյա ԱՆԴՐԵԱՍՅԱՆԸ
