Եվրոպայի խորհրդի Արդարադատության արդյունավետության եվրոպական հանձնաժողովը (ԱԱԵՀ) հրապարակել է արդարադատության ոլորտում եվրոպական 45 երկրներում գրանցված միտումները: Այս մասին ասվում է հանձնաժողովի տարածած հաղորդագրության մեջ:
Դրանում, մասնավորապես, նշվում է, որ 2012-2014թթ. ընթացքում Հայաստանը դատարանների ընդհանուր բյուջեն ավելացրել է 33%-ով: Ընդ որում, Հայաստանն այն երկրների թվում է, որոնք դատարանների վրա ծախսում են մեկ շնչի հաշվով 15 եվրոյից պակաս գումար. Հայաստանի դեպքում այդ ցուցանիշը 5 եվրո է: Դատական վճարները նույնպես Հայաստանում ցածր են՝ մեկ շնչի հաշվով՝ 0.84 եվրո: Իսկ երկրի դատարանների բյուջեում դատական վճարները կազմում են 16%: Ընդ որում, Հայաստանը պատկանում է այն 9 երկրների թվին, որոնց դատարանների բյուջեի 80%-ն ուղղվում է անձնակազմի աշխատավարձերի վճարմանը:
Զեկույցում նաև նշվում է, որ Հայաստանն այն քիչ երկրներից է, որը հատուկ միջոցներ է ձեռնարկել արդարադատության համակարգում գենդերային հավասարությանը խթանելու ուղղությամբ: Այնուամենայնիվ, Հայաստանում դատավորների 77%-ը տղամարդիկ են, 23%-ը՝ կանայք, իսկ կին նախագահողներ դատարաններում չկան: Նշվում է, որ տղամարդկանց թիվը Հայաստանի դատարաններում ավելի շատ է, քան եվրոպական երկրներում:
Հայաստանում կա ընդհանուր առմամբ 226 պրոֆեսիոնալ դատավոր. այդ թիվը 2010թ. ի վեր աճել է 11%-ով, այն դեպքում, երբ հանրային դատախազների թիվը 2010թ. հետո չի փոխվել (յուրաքանչյուր 100 000 բնակչին՝ 10.1)
Կարդացեք նաև
Զեկույցում նաև նշվում է, որ առաջին ատյանի դատարանների կողմից քրեական գործերի դեպքում 2014թ. վճիռները կայացվել են միջինը 135 օրվա ընթացում (համեմատության համար՝ 2010թ.՝ 78 օր):
Պատրաստեց՝ Վիկտորյա ԱՆԴՐԵԱՍՅԱՆԸ
