Aravot.am-ը Երեւանի Մ. Հերացու անվան բժշկական համալսարանի ռեկտորի պաշտոնակատար Արմեն Մուրադյանից հետաքրքրվեց՝ ճի՞շտ է, որ ինքը սկսել է ինչ-ինչ հարցերի շուրջ խորհրդակցել բուհի նախկին ռեկտոր Գոհար Քյալյանի հետ, եւ հնարավոր է՝ նա եւս որեւէ պաշտոնով վերադառնա բժշկական համալսարան:
Պարոն Մուրադյանն ասաց, որ խորհրդակցության է եւ չի կարող մեր ոչ մի հարցին պատասխանել, նաեւ առաջարկեց հարցերն ուղղել մամուլի ծառայության միջոցով:
Ռեկտորի պաշտոնակատարի մամուլի քարտուղար Տաթեւիկ Գրիգորյանը պատասխանելով Aravot.am-ի՝ Գոհար Քյալյանի վերաբերյալ հարցին, փոխանցեց հետեւյալը. «ԵՊԲՀ ռեկտորի ժամանակավոր պաշտոնակատար Արմեն Մուրադյանն ի պաշտոնե ունի խորհրդականներ, սակայն տեղեկացնեմ, որ այդ անձանց մեջ Գոհար Քյալյանը ներառված չէ, իսկ տիկին Քյալյանի ապագա ծրագրերի մասին, կարծում եմ ճիշտ կլինի ճշտել անձամբ իրենից» Նաեւ հետաքրքրվել էինք՝ ճի՞շտ է, որ ռեկտորի պաշտոնակատարի աշխատավարձը 2 մլն դրամ է: «ԲՈՒՀ-ում ռեկտորի աշխատավարձը, ըստ հաստիքացուցակի, 500.000 ՀՀ դրամ է, ի դեպ հարկերը ներառյալ»,- պատասխանեցին բժշկականի մամուլի ծառայությունից:
Կարդացեք նաև
Իմիջիայլոց, տեղեկանալով, որ Արմեն Մուրադյանը ռեկտորի պաշտոնակատար է դառնալու, անմիջապես խորհրդի կազմից դուրս գալու դիմում էր ներկայացրել առողջապահության նախկին նախարար Դերենիկ Դումանյանը, որը «հին հաշիվներ» ուներ Արմեն Մուրադյանի հետ: Դումանյանը ժամանակին ազատվել էր Քյալյանի կադրերից, օպտիմալացրել նաեւ Արմեն Մուրադյանի ղեկավարած ամբիոնը:
Ինչ վերաբերվում է Արմեն Մուրադյանին, նրա անունը կապվում է Պաշտպանության նախարար Վիգեն Սարգսյանի եւ Ռոբերտ Քոչարյանի փեսայի հետ: Արմեն Մուրադյանը վերջինիս հարսանիքի քավորն է:
Հավելենք, որ Դերենիկ Դումանյանն ու Գոհար Քյալյանը մեր հեռախոսազանգերն անպատասխան թողեցին:
Գոհար ՀԱԿՈԲՅԱՆ