Երեւանի Կենտրոն եւ Նորք-Մարաշ վարչական շրջանների ընդհանուր իրավասության դատարանն այսօր բավարարեց հուլիսի 20-ին Խորենացի փողոցում ոստիկանների եւ քաղաքացիների միջեւ բախման հետեւանքով կալանավորված Ալբերտ Ավագյանի, Հայկ Հովհաննիսյանի, Նարեկ Սարգսյանի եւ Արման Մխիթարյանի քրեական գործով արագացված կարգով դատաքննություն անցկացնելու պաշտպանական կողմի միջնորդությունը:
Ոստիկանների նկատմամբ բռնություն կիրառելու մեջ մեղադրվողներ Հայկ Հովհաննիսյանը, Արման Մխիթարյանը, Նարեկ Սարգսյանը եւ Ալբերտ Ավագյանը ընդունել են իրենց մեղքը, զղջացել կատարածի համար:
Ի դեպ, նախորդ նիստում դատախազն առարկել էր արագացված դատաքննություն կատարելու վերաբերյալ պաշտպանական կողմի միջնորդությունը, այսօր հայտարարեց, որ դեմ չէ:
Ամբաստանյալների պաշտպաններն այսօր դատարանին ներկայացրին իրենց պաշտպանյալների բնութագրերը, ինչից հետո դատախազը ժամանակ խնդրեց՝ մեղադրական ճառին նախապատրաստվելու համար: Դատական նիստը հետաձգվեց, հաջորդը նշանակվեց դեկտեմբերի 22-ին:
Կարդացեք նաև
Հիշեցնենք, որ Հայկ Հովհաննիսյանը, Արման Մխիթարյանը, Նարեկ Սարգսյանը եւ Ալբերտ Ավագյանը մեղադրվում են ՀՀ քրեական օրենսգրքի 225-րդ հոդվածի 2-րդ մասով՝ իրենց ծառայողական պարտականությունները կատարող, իշխանության ներկայացուցիչ հանդիսացող ոստիկանության աշխատակիցների նկատմամբ բռնություն գործադրելու մեջ:
Արփինե ՍԻՄՈՆՅԱՆ
