Եվրախորհրդարանը կողմ է քվեարկել Վրաստանի քաղաքացիների համար առանց այցագրի ռեժիմի սահմանմանը, հաղորդում է «Գրուզիա Օնլայնը»: Որոշմանը կողմ է քվեարկել 553, դեմ՝ 66 պատգամավոր, 28 պատգամավոր ձեռնպահ է մնացել:
Եվրախորհրդարանի՝ ԵՄ-ի հետ վիզայի չեղարկման հարցերով զեկուցող Մարիա Գաբրիելն ակնկալում է, որ առանց այցագրի ռեժիմը կգործի արդեն մարտի վերջից. Վրաստանի քաղաքացիներն առանց այցագրի 90 օրով կարող են մուտք գործել Շենգենյան գոտի:
Ըստ ընդունված ընթացակարգի՝ Եվրախորհրդարանի քվեարկությունից հետո որոշումը պաշտոնապես հաստատում է ԵՄ խորհուրդը՝ նախարարների մակարդակով: Օրենսդրական փոփոխությունները կհրապարակվեն ԵՄ պաշտոնական ամսագրում այն բանից հետո, երբ դրանք կստորագրեն Եվրախորհրդարանի նախագահը, ինչպես նաև ԵՄ խորհրդի նախագահող երկրի (Մալթա) համապատասխան ներկայացուցիչը:
Կարգավորումն ուժի մեջ կմտնի հրապարակումից հետո 21 օրվա ընթացքում:
Կարդացեք նաև
Պատրաստեց՝ Վիկտորյա ԱՆԴՐԵԱՍՅԱՆԸ