Փետրվարի 4-ին կայացավ «Առաքելություն» կուսակցության 3-րդ համագումարը, որի ժամանակ որոշում կայացվեց Ազգային ժողովի եւ Երեւանի ավագանու առաջիկա ընտրությունների կուսակցության մասնակցության վերաբերյալ:
«Առաքելություն» կուսակցության քաղխորհրդի անդամ Մանուկ Սուքիասյանը լրագրողների հետ զրույցում նշեց, որ 2013 թվականից ստեղծված «Առաքելություն» կուսակցությունը 2 հազարից ավելի անդամներ ունի, հիմնականում երիտասարդներ, որոնք այլ կուսակցությունների նման չունեն անդամատոմսեր, քանի որ այն, ըստ նրա, կաշկանդող է, պարտադրող է. «Մարդկանց՝ կուսակցական լինելու փաստին մի տեսակ վերապահումով են մոտենում»:
Մանուկ Սուքիասյանի խոսքերով՝ առաջիկա ընտրություններից ակնկալում ենք, որոշ կարծրատիպերի ջարդում, որոշակի անձնակենտրոն, իշխանական համակարգի փոփոխություն:
Կարդացեք նաև
4 տարիների պատմություն ունեցող կուսակցությունը չունի նախագահ, իսկ ձեռքբերումն, ըստ պարոն Սուքիասյանի, այն է, որ դեռ չի տարրալուծվել. «Մի անձի շուրջ հավաքված մարդիկ չեն, գաղափարի շուրջ համախմբված մարդիկ են, որոնք քայլ առ քայլ պետք է փորձեն հասնել հաջողությունների: Եթե չես կարողանում գալ իշխանության, փոփոխություններ բերել, ապա գոնե այն միջավայրում, որ քո ձայնը լսելի է եւ հարգելի՝ կարողանաս ազդել որոշումների վրա»:
«Առաքելություն» կուսակցության քաղխորհրդի անդամ Մերի Մուրադյանը ներկայացնելով կուսակցության բանաձեւը՝ նշեց, որ մոտակա իրենց գործունեությունը կշարունակվի «Ծառուկյան» դաշինքի շրջանակներում:
Համագումարի ժամանակ որոշվեց կուսակցության քաղաքական եւ վերստուգիչ հանձնաժողովի կազմը:
Համագումարին ներկա էր նաեւ ԲՀԿ պատգամավոր Վահե Էնֆիաջյանը, որը վստահություն հայտնեց, որ «Առաքելություն» կուսակցության հետ համատեղ աշխատանքով կիրականացնեն մեծ գործեր:
Ի դեպ, նշենք նաեւ, որ պատգամավորը համագումարի ավարտին լրագրողների հարցերի չպատասխանեց՝ ասելով՝ տարածքում եմ, չեմ գնում, մինչդեռ դուրս եկավ եւ անմիջապես գնաց:
Անուշ ՄԱԹԵՎՈՍՅԱՆ
