Երևանի ավագանու «Ազգային առաջընթաց» խմբակցության անդամ Արամ Թորոսյանն այսօր ավագանու նիստում առաջարկեց օրակարգում ընդգրկված 18-րդ հարցը, որը վերաբերում է քաղաքապետի, փոխքաղաքապետերի ու քաղաքապետարանի այլ աշխատակիցների աշխատավարձերի բարձրացմանը, դարձնել զեկուցվող, որպեսզի քաղաքացիներն էլ տեղեկանան այդ մասին։
Թորոսյանը նկատեց, որ հունվարից քաղաքապետի ու փոխքաղաքապետերի աշխատավարձերը կտրուկ բարձրանալու են։ Նա նաև նշեց, որ նախատեսվում է 30 տոկոսով բարձրացում։
Կարդացեք նաև
Թորոսյանին հակադարձեց ՔՊ խմբակցության ղեկավար Արմեն Գալջյանը։
«Որևէ տոկոսով այսօր աշխատավարձերի բարձրացում տեղի չի ունենում։ Չեմ հասկանում՝ ինչ նկատի ունենք տոկոս ասելով։ Մենք այսօր ընդամենը ֆիքսելու ենք գործակիցները, որոնցով հնարավոր կլինի հաշվարկել աշխատավարձերի չափերը բյուջեով»։
Արձագանքեց նաև «Մայր Հայաստանի» ավագանու անդամ Մանուկ Սուքիասյանը։
«Աշխատավարձերը թե՛ գործակցով կհաշվեն, թե՛ հարգանքի տուրքով, փաստացի հունվարից տեղի է ունենալու աշխատավարձերի բարձրացում, այնպես որ միանում ենք այդ առաջարկին։ Գտնում ենք, որ 18-րդ հարցը պետք է դառնա զեկուցվող, ու հանրությունը տեղեկանա, թե ինչի մասին է խոսքը»։
Առաջարկը դրվեց քվեարկության, որի արդյունքում որոշվեց, որ աշխատավարձերի բարձրացման հարցը կմնա չզեկուցվող։
Արփինե ՍԻՄՈՆՅԱՆ
