«ՀՀ ընտրական համակարգը կայուն է՝ համեմատած ԱՊՀ այլ երկրների, այդ թվում՝ ՌԴ-ի հետ, որտեղ որոշակի փուլերում տարբեր դրույթներ փոխվեցին»,-ԱՊՀ ՄԽՎ ժողովրդավարության զարգացման մոնիտորինգի միջազգային ինստիտուտի երևանյան մասնաճյուղի՝ «Դիտորդական առաքելությունը և դրա իրականացման կարգը ըստ ՀՀ նոր ընտրական օրենսգրքի» թեմայով քննարկման ժամանակ այսօր ասաց ԱՊՀ ՄԽՎ ԺԶՄՄԻ տնօրեն Դմիտրի Գլադեյը:
Նա հիշեցրեց, որ ՀՀ նախորդ երկու ԱԺ ընտրությունների ժամանակ կիրառվել է խառը ընտրական համակարգ, որի դեպքում կուսակցությունների առաջ խնդիր էր դրված հաղթահարել յոթ տոկոսանոց շեմը. «ՀՀ նախորդ նախագահական ընտրությունների ժամանակ էլ, որին եւս մասնակցում էին մեր դիտորդները, մեծամասնական համակարգ էր գործում, որը եւս, կարծում եմ՝ կայուն վիճակում էր»:
Ըստ պարոն Գլադեյի՝ ՀՀ նոր Ընտրական օրենսգրքով սահմանված տեխնիկական փոփոխությունները բերեցին նրան, որ ընտրական գործընթացն այնքան էլ չի արտահայտում քաղաքական իրականությունը. «ԸՕ փոփոխությունները խնդիրներ եւ դժվարություններ են ստեղծում: Հայտնի է, որ նորամուծությունները, ինչպես ցույց է տվել այլ երկրների փորձը. շփոթությունների տեղիք են տալիս, թեեւ ըստ փորձագետների՝ ընտրությունները կազմակերպողները կկարողանան հաջողությամբ կիրառել նորամուծությունները»:
Դմիտրի Գլադեյի բնորոշմամբ՝ խորհրդարանական կառավարման ձեւի անցումը, երբ նախագահին ընտրելու է Խորհրդարանը, քաղաքական համակարգում եւս փոփոխություններ մտցրեց:
Կարդացեք նաև
Լուիզա ՍՈՒՔԻԱՍՅԱՆ
