Սպորտային մարմնամարզության Հայաստանի առաջնությունում որոշվեցին տղամարդկանց եւ կանանց ինչպես բազմամարտի, այնպես էլ առանձին գործիքների վրա հաղթողներն ու մրցանակակիրները:
Տղամարդկանց ազգային հավաքականի գլխավոր մարզիչ Հակոբ Սերոբյանն ընդհանուր առմամբ գոհ է թե ազգային հավաքականի անդամների, թե երիտասարդների մասնակցությունից: Նրա խոսքերով, հավաքականի հիմնական անդամներ Հարություն Մերդինյանը, Արթուր Դավթյանը եւ Վահագն Դավթյանը նոր վարժություններ փորձարկեցին, որոնք դեռ պետք է կատարելագործել ու բարդացնել:
«Մարմնամարզությունում մեծ փոփոխություններ են կատարվում եւ պետք է դրանց ընթանալ համաքայլ: Տեսնենք, թե տղաները իրենց ինչպես կդրսեւորեն Դոհայում կայանալիք Աշխարհի գավաթի փուլում: Այդ ժամանակ կորոշենք մեր նոր անելիքները եւ կնախապատրաստվենք Եվրոպայի առաջնությանը», – ասում է Հակոբ Սերոբյանը:
Մարզիչը գոհ է նաեւ պատանի եւ երիտասարդ մարմնամարզիկների մրցելույթներից, որոնցից մի քանիսը առաջին անգամ մասնակցելով Հայաստանի մեծահասակների առաջնությանը՝ հաճելիորեն զարմացրել են իրեն: Խոսքը հատկապես Էրիկ Բաղդասարյանի եւ Ժորա Սմբատյանի մասին է, որոնք 2018 թվականի Պատանեկան ամառային օլիմպիական խաղերի իրական թեկնածու են եւ վարկանիշ նվաճելու համար Եվրոպայի առաջնությունում պետք է պայքարեն 16 լավագույնների մեջ տեղ զբաղեցնելու համար:
Կարդացեք նաև
Աշոտ ՀԱԿՈԲՅԱՆ
