«Մենք կարծում ենք, որ բոլոր վեճերը պետք է լուծվեն դատարաններում՝ խաղաղ ճանապարհներով»,- մարտի 24-ին լրագրողների հետ զրույցի ընթացքում, անդրադառնալով ՊԲ նախկին հրամանատար Սամվել Բաբայանի ձերբակալությանը, ասաց Հայաստանում ԵՄ պատվիրակության ղեկավար, դեսպան Պյոտր Սվիտալսկին:
Նա հավելեց, որ Եվրամիության համար կարեւոր է բռնության կանխարգելումը. «Մենք կարծում ենք, որ օրինապահ մարմինների լիազորությունների շրջանակներում է ցանկացած գործողության կանխարգելումը, որն ուղղված էր հասարակական կարգի եւ անդորրի խախտմանը: Այդ բոլոր ընթացակարգերում օրինապահ մարմինները պետք է թափանցիկ կատարեն բոլոր գործողությունները, եթե կասկած կա, որ ինչ-որ վատ բան է նախապատրաստվում կամ կատարվում: Մենք կարծում ենք, որ այդպիսով քաղաքացիները վստահ կլինեն, որ դա քաղաքական նպատակներ չունի կամ նպատակ չի հետապնդում վախեցնել մյուսներին, բայց դա արվում է օրենքի գերակայության մեջ»:
Ամի ՉԻՉԱԿՅԱՆ
