2016-ին Հայաստանից արտագաղթած մեր քաղաքացիների 53 տոկոսը մեկնել է անվերադարձ: Մինչ այժմ մեկնածների համամասնությունը եղել է հօգուտ վերադարձողների: Այսօր «Բլից ինֆո» մամուլի ակումբում այսպիսի մտահոգություն հայտնեց «Վերադարձ եւ պաշտպանություն սոցիալ-իրավական» հ/կ նախագահ Տաթեւիկ Բեժանյանը:
Ըստ նրա, մեր միգրանտների հիմնական ուղղությունը Ռուսաստանի Դաշնությունն է, ապա` հետխորհրդային երկրները, Եվրոպան, ԱՄՆ-ն, Կանադան:
Ռուսաստան մեկնում են աշխատանքային միգրանտները, Եվրոպա` ապաստան հայցողներն ու կարգավիճակ ակնկալողները: Կանադան էլ ավելի շատ մասնագետ-միգրանտներին է նախապատվություն տալիս:
Վերջին երկու-երեք տարին դեպի ՌԴ նվազել է աշխատանքային միգրանտների հոսքը, ինչը, սակայն, ոչ թե մեր երկրի սոցիալ-տնտեսական վիճակի բարելավմամբ է պայմանավորված, այլ` Ռուսաստանի տնտեսական վատ վիճակով: Տաթեւիկ Բեժանյանը համոզված է` հենց ՌԴ-ում վիճակը լավացավ, միգրանտների հոսքն ավելանալու է:
Կարդացեք նաև
Տիկին Բեժանյանը ափսոսանքով է նշում, որ Հայաստանից մեկնողների 20 տոկոսը բարձրագույն կրթությամբ են. «Այսինքն` մեր պետությունը ծախսեր է անում, կրթում, իսկ հետո չի կարողանում արժանապատիվ աշխատատեղ ապահովել, որպեսզի այդ մարդիկ մնան Հայաստանում եւ ստացած գիտելիքները մեր երկրին ծառայեցնեն»:
Aravot.am-ի այն հարցին, թե մասնագետները պնդում են, որ ամեն ընտրությունից հետո արտագաղթի ալիք է նկատվում, քանի որ մարդիկ ինչ-ինչ հույսեր կապելով փոփոխությունների հետ, հիասթափություն են ապրում` երբ տեսնում են դրանք տեղի չեն ունենում, արդյոք այս ընտրություններից հետո էլ կավելանա՞ արտագաղթը, տիկին Բեժանյանը պատասխանեց. «Բնականաբար, սպասվում է այդ ալիքը եւ ամեն ընտրությունից հետո հիասթափությունը ունենում է իր ազդեցությունը»: Սակայն, թե ինչ կլինի այս ընտրություններից հետո, Տաթեւիկ Բեժանյանը ձեռնպահ մնաց մեկնաբանելուց:
Մեր այն հարցին, թե կառավարությունը հազարավոր աշխատատեղեր է ծրագրում մոտ ապագայում բացել, ներդրումներ են խոստացել, որոնց մի մասն արդեն կատարվել են, հնարավո՞ր է այս ամենի հետեւանքով մեր երկրից միգրացիան նվազի, Տաթեւիկ Բեժանյանը պատասխանեց, որ եթե մարդիկ աշխատանք էլ ունեն, ապա արժանավայել չեն վարձատրվում եւ արտագաղթելու պատճառներից մեկն էլ դա է:
«Մեր միգրացիայի հիմնական պատճառը սոցիալ-տնտեսականն է: Ես վստահորեն կարող եմ ասել, որ, եթե սոցիալ-տնտեսական վիճակը Հայաստանում բարելավի, անպայման միգրացիոն հոսքերը կնվազեն: Սակայն միայն աշխատանք ունենալը դեռեւս պայման չէ, որ կնվազեն միգրացիոն հոսքերը: Պետք է արժանապատիվ աշխատանք լինի, որովհետեւ մենք ունենք միգրացիա ոչ միայն աշխատանքի բացակայությունից, այլեւ ցածր վարձատրվելու պատճառով»:
Լուսինե ԲՈՒԴԱՂՅԱՆ
