Մոսկվայի նախկին քաղաքապետ Յուրի Լուժկովը կներառվի Վրաստանի «սև ցուցակում» և չի կարողանա այսուհետ մուտք գործել Վրաստան: Այս մասին, ինչպես հաղորդում է «Գրուզիա Օնլայնը», հայտարարել է Վրաստանի ներքին գործերի փոխնախարար Շալվա Խուցիշվիլին:
«Այն, ինչ տեղի ունեցավ այս փուլում, պայմանավորված էր նրանով, որ ժամանակին նա չէր ներառվել ցուցակում: Մենք նրան կներառենք այդ ցուցակում, և նա չի կարողանա մուտք գործել Վրաստան»,- ասել է փոխնախարարը:
Հիշեցնենք, անցյալ շաբաթ Լուժկովի այցը Վրաստան մեծ աղմուկի տեղիք էր տվել վրացական հասարակության մեջ: Նախկինում բազմիցս Լուժկովն այցելել էր Աբխազիա և Հարավային Օսիա: Համաձայն Վրաստանում գործող «Օկուպացված տարածքների մասին» օրենքի՝ առանց Թբիլիսիի գիտության այդ տարածքներ մուտք գործելը անօրինական է և պատժվում է կամ խոշոր դրամական տուգանքով, կամ մինչև 4 տարի ազատազրկմամբ:
Պատրաստեց՝ Վիկտորյա ԱՆԴՐԵԱՍՅԱՆԸ
