Տավուշի մարզպետարանի ինտերնետային կայքը տեղեկացնում է, որ մայիսի 17-ին մարզպետարանում կայացել է «Արմենիա Գազ Փաուեր Ինտերփրայզիս» ընկերության դուստր ձեռնարկության՝ «Ագապեի կողմից նախաձեռված հանրային քննարկում:
«Ագապե» ՍՊԸ ֆինանսական տնօրեն Քրիստինե Վարդանյանը, հետախուզման կոորդինատոր Մարիամ Սարգսյանը, ավագ երկրաբան Դավիթ Խոնդկարյանը նշել են, որ ընկերությունը նախատեսում է նավթի եւ գազի երկրաբանական ուսումնասիրություններ կատարել Տավուշի մարզի 3-րդ պայմանական տարածքում: Նրանք մանրամասներ են ներկայացրել երկրաբանահետախուզական աշխատանքների մեթոդաբանության եւ ծավալների, սեյսմահետախուզական աշխատանքների ընթացքում օգտագործվող սեյսմավիբրատորների տեխնիկական նկարագրության մասին: Նրանք նշել են, որ այդ աշխատանքները կկատարվեն «Բնության հատուկ պահպանվող տարածքների մասին» օրենքին համապատասխան:
Փորձեցինք հանրային քննարկման մասին մանրամասներ իմանալ Տավուշի մարզպետարանի գյուղատնտեսության եւ բնապահպանության վարչությունից, սակայն այդ վարչություն կատարած մեր հեռախոսազանգերն անպատասխան մնացին:
Իրազեկման մասնակից համայնքի ղեկավարներից իմացանք, որ հանրային քննարկման ժամանակ չի հայտարարվել, թե նավթի եւ գազի որոնումները Տավուշի որ տարածքներում են կատարվելու: Նշվել է, որ նավթ ու գազ որոնող ընկերության համասեփականատերերը Հայաստանի կառավարությունն է եւ կանադական մի ընկերություն:
Ոսկան ՍԱՐԳՍՅԱՆ
հանրային քննարկման լուսանկարը՝ Տավուշի մարզպետարանի ինտերնետային կայքից
