Ազգային ժողովի 6-րդ գումարման անդրանիկ նիստը, ինչպես արդեն տեղեկացրել էինք, մեկնարկեց ընդդիմության բոյկոտով ՝ «Ելք» դաշինքը դեմոնստրատիվ կերպով զերծ մնաց նախագահ Սերժ Սարգսյանի և կաթողիկոսի ելույթների ունկնդրումից: Ինչպե՞ս են վերաբերվում այս երևույթին իշխող կուսակցության ներկայացուցիչները, փորձեցինք ճշտել ՀՀԿ խմբակցության պատգամավոր Հերմինե Նաղդալյանից:
– Իհարկե, յուրաքանչյուր քաղաքական ուժ և գործիչ ինքն է ընտրում իր գործելակերպը, իհարկե, բոյկոտը, որպես քաղաքական պայքարի միջոց կամ գործիք, ընդունված է, գոյություն ունի , բայց, կարծում եմ, որ Հայաստանի հանրապետությունում պառլամենտարիզմի զարգացման շատ վաղ աստիճաններում է կիրառվել այն, և այսօր՝ քաղաքական այս կարևոր անցման շրջանում, որը մենք կատարում ենք, բոլորովին հարիր չէր նման անլուրջ պահվածք:
Մենք շատ լուրջ փոփոխություն ենք կատարել մեր երկրի կյանքում դեպի խորհրդարանական հանրապետություն, որը ենթադրում է շատ ավելի ծավալուն և խորքային մասնակցություն ընդդիմադիր քաղաքական ուժերի կողմից և, բնական է, որ և՛ հանրության սպասելիքները, և՛ պահի կարևորությունը ակնկալում են ավելի լրջմիտ մոտեցումներ:
Մամլո հաղորդագրություն
