Երեւանի ավագանին որոշեց համայնքի բյուջեի եկամուտներն ու ծախսերն ավելացնել

Երեւանի ավագանին այսօր որոշեց համայնքի բյուջեում փոփոխություններ կատարել:

Ըստ այդմ, ավագանին որոշեց Երեւան համայնքի բյուջեի եկամուտների գումարն ավելացնել 59,9 միլիոն դրամով, եւ նույնքան էլ ավելացնել ծախսերը:

Նախագծում բյուջեում կատարված փոփոխությունը պայմանավորված է որոշ ծրագրերով: Նախագծում նշված է, որ բյուջեում վերաբաշխումն ու փոփոխությունները կառավարության համապատասխան որոշման համաձայն է. «Ինչի արդյունքում պետության կողմից Երեւանի քաղաքապետին պատվիրակված լիազորությունների ֆինանսավորման գծով Երեւան քաղաքի 2017 թվականի բյուջեին նախատեսված հատկացումներն ավելացել են ընդհանուր 59,9 միլիոն դրամով»: Հատկացումներն ավելացել են ըստ հետեւյալ ծրագրերի՝

1-ին՝ Վերակառուցման եւ զարգացման եվրոպական բանկի աջակցությամբ իրականացվող Երեւանի մետրոպոլիտենի վերակառուցման 3-րդ ծրագրի գումարները նվազեցնել 57 միլիոն դրամով:

2-րդ՝ Եվրոպական ներդրումային բանկի աջակցությամբ իրականացվող Երեւանի մետրոպոլիտենի վերակառուցման 3-րդ ծրագրի գումարները նվազեցնել 57 միլիոն դրամով:

3-րդ՝ Եվրոպական ներդրումային բանկի աջակցությամբ իրականացվող «Երեւանի կոշտ թափոնների կառավարման» ծրագրի գումարները նվազեցնել 228 միլիոն դրամով:

4-րդ՝ Վերակառուցման եւ զարգացման եվրոպական բանկի աջակցությամբ իրականացվող «Երեւանի կոշտ թափոնների կառավարման» ծրագրի գումարները նվազեցնել 228 միլիոն դրամով:

5-րդ՝ Ֆրանսիայի Հանրապետության կառավարության աջակցությամբ իրականացվող Երեւանի ջրամատակարարման եւ ջրահեռացման ծրագրին տրամադրվող տեխնիկական աջակցության ծրագրի գումարներն ավելացնել 560 միլիոն դրամով:

6-րդ՝ Վերակառուցման եւ զարգացման եվրոպական բանկի աջակցությամբ իրականացվող Երեւանի ջրամատակարարման բարելավման ծրագրի գումարներն ավելացնել 70 միլիոն դրամով:

Նելլի ԲԱԲԱՅԱՆ