Ինչպես տեղեկացրել ենք, այսօրվանից Գյումրու ավագանու նիստերին կմասնակցի նաև Արթուր Բաղդասարյանի կուսակցությունը՝ «Հայկական վերածնունդը», որն ունի ավագանու չորս անդամ և որը տևական ժամանակ բոյկոտում էր նիստերը՝ Գյումրու ՏԻՄ ընտրությունների արդյունքները բողոքարկելով դատական տարբեր ատյաններում։
ՀՎԿ-ից Գյումրու ավագանու անդամ ընտրվածներից մեկը Վարդան Ղուկասյանի փեսան է՝ Ավետիս Առաքելյանը։ Սամվել Բալասանյանն այսօր տեսնելով ՀՎԿ անդամներին՝ շատ ուրախացավ ու սկսեց աչքալույս տալ Վարդան Ղուկասյանի փեսային որդի ունենալու ուրախ առիթով։ Քաղաքապետը ներկաներին անգամ հորդորեց մի լավ ծափահարել Ավետիսի որդու լույս աշխարհ գալու առիթով։
Քիչ անց լրագրողները մեկը մյուսին սկսեցին հարցնել, թե ո՞ւր գնաց Ավետիսը՝ նիստը կիսատ թողնելով։ Երբ այս հարցը ուղղեցինք ՀՎԿ խմբակցության քարտուղար Հասմիկ Եղիազարյանին, տիկինն ասաց․ «Չտեսա՞ք, որ ծննդատուն էր շտապում»։
Սամվել Բալասանյանը երկու հայտարարություն արեց, ընթերցեց Վարդևան Գրիգորյանի դիմումը, որով նա խնդրում է դադարեցնել ավագանու անդամի լիազորությունները, քանի որ ընտրվել է ԱԺ պատգամավոր։
Երկրորդ հայտարարությամբ ընթերցեց ավագանու նիստերին բացակայած 16 անդամների լիազորությունները վաղաժամկետ դադարեցնելու մասին նախագիծը։ Սակայն Բալասանյանը նշեց, որ որոշել է այն չմտցնել օրակարգ, հետաձգել, որպեսզի նրանք հնարավորություն ունենան տեղեկանք ներկայացնել իրենց բացակայությունների մասին։ Հիշեցնենք, որ ավագանու նիստերը բոյկոտում են ԲՀԿ-ն ու ԳԱԼԱ-ն։
Նունե ԱՐԵՎՇԱՏՅԱՆ
